New Delhi, Nailur 01
Ka Sorkar Pdeng ka la thung ïa u President barim ka Ri, u Ramnath Kovind, ba un khlieh ïa ka kynhun ka ban peit bniah halor ka jingthmu ban pynlong tang kawei ka ilekshon ha ka Ri baroh kawei.
Katkum ki khubor na nongbah Delhi, la ong ba kane ka jingthung ïa u Kovind ka wan shi sngi hadien ba ka Sorkar Pdeng ka la pynbna ba kan don ka Dorbar Kyrpang jong ka Parliament naduh 18 haduh 22 tarik Nailur. Hynrei ka Sorkar Pdeng kam pat ïathuh balei la khot ïa kane ka Dorbar Kyrpang ba san sngi,
Tangba ka jingpynbna ïa ki sngi jong ka Dorbar Kyrpang ka la pynlong ïa kiba bun ban mutdur ba ka sorkar BJP ka kwah ban wanrah da ka aiñ rew ban pynurlong ïa ka jingthmu ban pynlong tang kawei ka ilekshon ha ka Ri lane kawei ka Ri, kawei ka ilekshon (One Nation, One Election). Hynrei ïa kane ruh, ka Sorkar Pdeng kam pat pynthikna ne kren eiei.
Ka jingmut jong kawei ka Ri, kawei ka ilekshon ka long ban pynlong lang ha kajuh ka por ïa ka ilekshon sha ka Dorbar Lok Sabha bad sha ki Ïingdorbar Thawaiñ ki jylla lane ka ilekshon MLA. Ïa kaba kum kane, la ju leh teng ha India ha ki snem kiba kham mynshwa. Na ka liang ka BJP bad u Myntri Rangbahduh, u Narendra Modi, ki la kren halor kane la bunsien bad ka la don ruh ha ka mat treikam jong ka BJP ha ka ilekshon Lok Sabha ha u snem 2014.
Haduh u snem 1967, la pynlong lang ha kajuh ka por ïa ka ilekshon Lok Sabha bad ha ki jylla, bad la lah ban pynlong saw tylli ïa kiba kum kita ki ilekshon. Hynrei kane ka la sangeh noh hadien ba ki la don ki Ïingdorbar Thawaiñ ki jylla kiba la shah pynwai noh khlem pat kut ka samoi ba san snem ha u snem 1968-69.
Ha u snem 1970, ha ka sien banyngkong eh, la pynwai noh ïa ka Dorbar Lok Sabha bad ïa ka ilekshon shiteng samoi la pynlong ha u snem 1971.
Ha ka ilekshon Lok Sabha ha u snem 2014, ka BJP ka la bsut ïa ka jingkular ba kan wanrah ïa ka rukom treikam ka ban pynthikna ba yn pynlong lang ha kajuh ka por ïa ka ilekshon Lok Sabha bad ha ki Dorbar jong ki jylla lane ilekshon MLA.
Ha u snem 2019 hadien ka ilekshon Lok Sabha, u Myntri Rangbahduh u la ïakren bad ki seng saiñpyrthei halor katei ka mat. Hynrei kiba bun na ki nongïalam ki seng kiba don ha ka liang pyrshah ki khlem leit satia ban ïashim bynta ha katei ka jingïalang.
U Myntri Rangbahduh u la dep pynpaw ba ka jingpynlong ilekshon ba khah-khah ka ktah ïa ka pla tyngka jong ka Ri bad ka pynthut ïa ka synshar ka khadar.
