Shillong, Nailur 01
Ka jingkynmaw burom ïa u nongïalam ba la khlad noh, u Purno Agitok Sangma ha ka sngi dap snem jong u kaba 76 la pynlong ha ka Jylla ha kaba la don ka jingïalang kynmaw burom ha Tura bad Shillong.
Ha Tura, ïa ka 7th PA Sangma Memorial Lecture la pynlong da ka skulbah NEHU, Tura Campus, lem bad ka P A Sangma Foundation ha District Auditorium, Tura kum ka jingkynmaw burom ïa une u nongïalam ha ka sngikha kaba 76 snem jong u, ha ka jingdonlang u Myntri Rangbah u Conrad K Sangma lem bad ka ïing ka sem nalor u nongthoh khubor uba dei u Editor-in-Chief The Print, u Shekhar Gupta kum uwei na ki nongai jingkren.
Ha Shillong, la pynlong ïa ka jingkynmaw burom ïa u PA Sangma da kaba ai snam sngewbha kaba la pynlong ha shlem treikam ka NPP ha Lachumier ha kaba la donlang u President ka State NPP Unit u Dr Wanwei Roy Kharlukhi nalor u Symbud Myntri Rangbah u Bah Prestone Tynsong bad kiwei kiwei.
Ha kane ka sngi, na ka liang u Conrad lem bad ki dkhot ka ïing ka sem ki la leit buh syntiew ha lum jingtep jong u Purno nalor u motdur jong u ha PA Sangma Stadium, Tura.
U Conrad u la ong ba ka jingainam ïa u PA Sangma ka dei da kaba bud ïa ki dienjat jong u bad nongrim kiba u la buh hakhmat eh ïa ka ri, bad ki paidbah.
Kumta u la kyntu ïa ki paidbah ban bud ïa ka nongrim jong u kpa jong u kum u nongïalam uba long ruh u nonghikai bad nongkdew lynti ym tang ïa la ki khun bad uba ju banjur ruh ban buh ïa ki paidbah hakhmat bad haba shim rai na ka bynta ka jingbha jong baroh.
Ha kane ka sngi la donlang ka MP ka Tura, ka Agatha K Sangma, ka kmie ka Sarodini K Sangma, u James PK Sangma bad kiwei kiwei.
