Shillong, Nailur 01
U MP ka Rajya Sabha, Dr. W.R. Kharlukhi u la kren shai ba u kyrshan ïa ka kam tih dewïong namar une u marpoh khyndew u long ka lad kamai na bynta ki nongshong shnong ka Ri-lum Jaiñtia.
“Kane kam dei ka nongrim kaba ka Sorkar ka ïeng, hynrei ka nongrim kaba nga-nga ïeng, la bun ki jingthoh kiba nga la ai ba u dewïong na bynta jong ngi ki nongshong shnong ka Ri-lum Jaiñtia, u dei ka lad kamai ja kpoh,” la ong u Dr. Kharlukhi haba kren sha ki lad pathai khubor ha ka Sngi Thohdieng.
Haba kdew ba ïa katei ka bynta la shon ha ki hok jong ki paidbah, u la ong ba ka jingkhang tih dewïong na bynta ki briew jong u – ïa kaba la trei mynta la jan 40 snem, ka long kumba pynduh bam na bynta jong ki.
“Haduh katno kane ka la ktah ïa ki briew jong ngi shatei, nga kyrshan beit barabor ïa ka kam tih dewïong…na kata ka daw nga ong phi lah ban sdang da kano-kano ka jait jingtih dewïong hynrei ki briew jong nga ki hap ban im,” u la ong.
Haba kylli, u MP u la ong, “La 40 snem ki la leh ïa kane…mynta shisien ka sngi phi kyndit bynriew. Haba ki briew jong nga ki duk, ym don ba ïohi.”
Ha kajuh ka por, u la kynthoh ruh ïa kito kiba la nang la stad kiba ju khot ïa kito kiba don bynta ha ki kam tih dewïong kum ki ‘Coal Baron’ ne ‘Mafia’.
Haba pynshai ba ka kam tih dewïong kam thew bad shakri tang ïa kiba ’riewspah, u Dr. Kharlukhi u la ong ba kane ka kynthup naduh ki Kong die kwai, ki nongdie ‘challan’, nongdie sha bad ja, bad ka shakri ruh wat ïa kito kiba ha Shillong – ïa ka ïoh ka kot jong ka Jylla.
Kumjuh, haba kynthoh ïa ka jingkhang tih dewïong jong ka NGT, u MP, uba dei ruh u State-President ka NPP u la ong, “Ngi don ka jingjaboh lyer ha Delhi khamtam ha ka por tlang. Ka NGT ka don ha Delhi bad nga la buh jingkylli ha Parliament. Kam dei tang haba ïadei bad ka jingpang hynrei ka jingïap…ym jong ki dohkha ne mrad, hynrei jong ki briew, balei ym shym la leh eiei. Dei ban leh eiei hangthie ruh bad ka NGT ruh ka don ha Delhi.”
Halor ka jingtih dewïong katkum ka juk stad saïan, utei u nongïalam u la ban jur halor ka jingdonkam ban tih ïa u dewïong da kaba ong ba ka jingtih kam dei ban sangeh.
Shuh shuh u la bynrap, “La 40 snem ngi la leh ïa kane bad shisien ka sngi, phi shu khang ïa kane khlem ka jingpyrkhat. Ka Sorkar Pdeng ka dei ban tyrwa…katne ki briew jong phi ki duhnong, shim kane ka pisa, ïa kata ruh ym shym la leh. La shu khang kumto tangba ngi don shane sha jngai ha ka Thaiñ Shatei Lam Mihngi, kam dei ban long kumne. Ngi ruh ngi dei shi bynta jong ka India bakhraw.”
