Mumbai, Nailur 01 (UNI)
Ka kynhun synrop jong ki seng kiba don ha ka liang pyrshah, ka Indian National Developmental Inclusive Alliance (I.N.D.I.A), ka mihkhmat ïa 60 na ka 100 ki nongshong shnong ka Ri, bad kan eh bha ïa ka BJP ba kan jop ïa ka ilekshon Lok Sabha ka ban long ha u snem ban wan lada ki seng saiñpyrthei kiba don ha ka kynhun I.N.D.I.A ki ïatylli, la ong u MP ka seng Congress, u Rahul Gandhi, ha ka Sngi Thohdieng.
“Kaei kaba kongsan ban sngewthuh ha kane ka por ka long ba kane ka rynsan ka mihkhmat ïa 60 na ka 100 ki nongshong shnong ka Ri. Lada ki seng kiba don ha kane ka rynsan ki ïatylli, kan eh bha ïa ka BJP ba kan jop ha ka ilekshon Lok Sabha. Ka kam ba hakhmat eh jong ngi ka long ban ïatylli ha ka rukom kaba dei,” la ong u Rahul haba kren sha ki lad pathai khubor hadien ka jingïalang ka kynhun I.N.D.I.A.
Haba pyntip ba ka kynhun ka don artylli ki kam bakongsan ha kane ka jingïalang bad kawei ka long ba la dep ban thaw ïa ka ‘Coordination Committee’ bad kiwei pat ki ‘Committee’. Ka bynta kaba ar ka long ban shim rai ban pynsted ïa ka jingïasam ïa ki konstitwensi ban ïakhun hapdeng ki seng kiba don ha ka kynhun I.N.D.I.A.
Haba kynnoh ba ka sorkar u Narendra Modi ka tuh ïa ka pisa jong ki briew ki baduk bad ban aiti sha kiwei pat, u Rahul u la ong ba ka kynhun I.N.D.I.A kan sa wanrah da kawei pat ka rukom treikam ban pynroi ïa ka Ri.
“U Myntri Rangbahduh bad ka BJP ki ïadon bynta ha ki kam bamsap bamngem bad kan dei kane ka kam banyngkong ba ka I.N.D.I.A kan pynshisha. Ka sorkar jong u Modi ka shim ïa ka pisa na ki baduk jong ka Ri bad ban aiti pat sha ki khyndiat ngut ki briew,” la kynnoh u Rahul.
Shuh shuh u la ong ba hadien lai tylli ki jingïalang jong ki kynhun ba pyrshah BJP, u sngew skhem ba kine ki jingïalang ki la lah ban kham pynïajan ïa ki nongïalam baroh ban pynthikna ba kan don ka jingïatreilang.
“Nga ïohi ba ka don ka jingkylluid jingmut hapdeng ki nongïalam. Ki don ki jingïapher jingmut, hynrei nga itynnad ba ïa kita ki jingïapher jingmut la pynbeit bad pynduna,” u la bynrap.
Nalorkata, u Rahul u la kynnoh ba ki lad pathai khubor ha ka Ri ki la shah teh kynjri bad u la ong ba ka kynhun I.N.D.I.A ka dang pyrkhat bad trei kumno ban pyllait ïa ki na u kynjri.
Ha kane ka sngi, la thaw ïa ka Central Coordination Committee jong ka I.N.D.I.A kaba don 14 ngut ki dkhot bad ka Campaign Committee kaba don 19 ngut ki dkhot. Nalorkata, la thaw ïa lai tylli ki Working Group halor ka Social Media, Media bad Research.
Ha ka Central Coordination Committee la don lang u nongïalam ka NCP, u Sharad Pawar, u Myntri Rangbah ka Jharkhand, Hemant Soren, arngut ki Myntri Rangbah barim ka Jammu & Kashmir, u Omar Abdullah (National Conference) bad ka Mehbooba Mufti (PDP) bad kiwei. Kane ka kynhun kan shim ïa ki rai ban pynbeit ïa ka jingtreikam ka I.N.D.I.A ha ka jingpynkhreh na ka bynta ka ilekshon.
