Shillong, Nailur 01
U State-President ka National People’s Party (NPP), uba dei ruh u MP ka Rajya Sabha, Dr. W.R. Kharlukhi u la ong ba ka seng kam pat rai eiei haba ïadei bad ka jingpynïeng kyrtong ha kane ka ilekshon ban wan sha ka Lok Sabha.
“Ngi kyrmen ban jop ha kane ka ilekshon ban wan wat la ngim pat shim rai halor u kyrtong u ban mihkhmat ïa ka seng,” la ong u Dr. Kharlukhi ha ka Sngi Thohdieng.
Ha kajuh ka por, u la pyntikna ba ka seng kan pynïeng kyrtong ha kane ka ilekshon ban wan wat la kam pat shim rai halor kane ka bynta.
Halor ka jingkwah pynïasoh NPP u Bah H.M. Shangpliang, u President u la ong, “Ngi ïohi ha ki lad pathai khubor hynrei to ngin sa peit. Ban ong ban pynïasoh pura sha ka seng te ym pat don.”
Haba kylli, u la ong ba haba ïadei bad ka ilekshon Lok Sabha, kane ka dei ka por kaba ka seng ka pynkhreh bha ïalade ha Ri-lum Khasi-Jaiñtia bad lada phai sha ka jingïoh ‘VOTE’, ka seng ka dei kaba ïoh heh tam ha kane ka ilekshon ba la dep.
“Lada ngi leit da kata, balei ngim jop,” u la ong.
Halor ka jingduna MLA ha Ri-lum Khasi-Jaiñtia, u Dr. Kharlukhi u la ong, “Phi ïohi uwei u MLA katno ‘VOTE’, kawei ka ‘VOTE’, hynrei ki nongthep ‘VOTE’, palat 3 lak tam ki la thep sha ka NPP ha kane ka ilekshon ba la dep. Kane ka dei kaei kaba donkam tam, ym ki MLA ne MP…nga ruh tang kawei ka ‘VOTE’.”
Haba jubab, u la ong ba kum ka seng, ka sngew dei ban pynïeng beit da u kyrtong lajong na Shillong.
“Ha shuwa, ngi ju don u kyrtong ïamon lang hapdeng ka UDP-NPP, hynrei ka risol ka long kumjuh, mynta ka kynti, ngi la ong to ngin don noh la u jong u kyrtong khnang ba ngin lah ban jop ïa ka ilekshon. Balei ngin don tang kawei ka MP ha Lok Sabha, balei ym don ar…,” la ong utei u nongïalam.
Shuh shuh u la ong ba ka jingïalang ban jied ïa ki kyrtong ka seng kan kham shim por namar ka ilekshon kan long haduh u Jymmang jong u snem ban wan.
