Nongpoh, Nailur 01
Ki pulit ka Ri Bhoi lyngba ka Anti Narcotics Task Force (ANTF) ha ka Sngi Thohdieng ki la ïoh kem noh ïa uwei u briew uba dei na ka jylla Assam ïa uba la suba donkti ban shalan ïa u drok hadien ka jingpynap shrip kaba la pynlong ha ki bynta jong u surok bah National Highway 6 ha Shangbangla.
Kumba la ïoh jingtip, la ïathuh ba ki bor pulit hadien ka jingïoh jingtip kaba thikna hynne ka step, ki la pynlong ïa ka jingpynapshrip bad dei tat haduh ka por kumba 2:13 baje nohphai sngi, ba ki la ïoh ban bat noh ïa kawei ka kali kamai kaba la shong bad pyndonkam da utei u briew uba la suba donkti.
Ïa utei u briew uba la ïoh kem noh da ki pulit, la tip kyrteng kum u Nurul Huda, na ka thaiñ Nagaon jong ka jylla Assam. Ha ka jingtalasi ki bor pulit ïa utei u briew, la ïoh ban kurup kumba lai tylli ki jingsop sabon kiba la song ïa u kynja drok ha ka jingïadon ryngkat ki sakhi. Na ka liang ki bor pulit ki la pynlong ïa ka jingkhmih bniah, bad la paw ba u dei u drok Heroin uba don ïa ka jingkhia 29.2 gram.
Nalor utei u drok, ki bor pulit ki la kurup ïa kawei ka mobile phone kaba la pyndonkam da utei u Nurul Huda bad na ka liang ki bor pulit ki la pynngat ïa u ha ki kyndon aiñ jong ka NDPS Act bad ka jingtohkit ban lapdien ïa kiwei kiba donkti ha kane ka kam shalan be-aiñ ïa utei u jingdih pynbuaid ka dang ïaid shakhmat.
