Nongstoiñ, Nailur:
Ka la long ka jingmyntoi bad ka jingkyrkhu ïa ki khynnah skul ka FGEM Higher Secondary School Nongspung ha kaba na ka liang ka MCAB Bank Nongstoiñ Branch ha ka sngi Palei ka la ïoh ban pynshai paidbah ha kaba ïadei bad kumno ban kynshew pisa sha Bank bad ban pynsngewthuh ha kaba ïadei bad ki kam pisa-tyngka.
Ïa kane ka prokram ba la pynlong hapoh ka skul la pynïaid ïa ka jingïalang da u Principal jong ka skul Bah Kyrshan Marngar ha ryngkat ka jingïadonlang ki nonghikai bad ki khynnah skul. Na ka liang u Principal u la pynpaw ka jingsngewnguh bad ai khublei ïa ka Meghalaya Co-operative Apex Bank kaba la kner lem ki jingïarap ban pynbit pynbiang bad ban kyntiew ïa ka pule puthi.
Na ka liang u Bah TK Wanniang, Chief Manager ka Apex Bank Nongstoiñ Branch u la pynshai bniah shaphang ka Education Loan bad ka PMEGP na ka bynta ka jingkyrshan ïa ki khynnah skul ban bteng ïa ka pule puthi jong ki bad ka skhim Prime Minister Employment Generation Programme na ka bynta ban seng kam seng jam lajong namar ban ap tang ka kam sorkar ka long kaba eh.
U la ong ruh “baroh ki jait kam (Service) bapher bapher ngi donkam ïa ki Bank,” kumta na ka liang ka Bank ka ïaleh ban ai ka jingshakri kaba bha ïa ki paidbah ka thaiñ bad kumjuh ruh u la kyntu ban minot, ban trei shitom ha kino-kino ki kam namar mynta baroh ki jait kam ka don beit ka jingïaleh.
