Jowai, Nailur 01
Ka tnat Forest ha ryngkat ki bor synshar distrik jong ka sorkar Assam ha ka Sngi Palei ki la mait naphang ïa ki dieng kwai bad kiwei pat ki mar rep jong ki jaitbynriew Khasi-Pnar kiba shong ba sah mynta la da ki spah snem.
Katkum ka jingtip ba la ïohlum la ong ba kine ki shnong Khasi kiba la shah pynjulor ki mar rep ha ka tnat Forest jong ka Assam ki dei kiba la tip kum ka Durgacherra, Durbintilla bad Dabinalla ba hap hapoh Silchar Sadar Circle, Borkhola Police Station.
Shuh shuh ka khubor ka la ong ruh ba kine ki shnong ki dei kiba hap hapoh ki jaka ba ki sorjamin na ka bynta ka jingtan bording ilektrik jong ka Power Grid.
La ong ruh ba na ka liang ki nongshong shnong kiba dei ki Khasi Pnar ki la dep tip thikna halor ka jingtreikam jong ka Power Grid, bad kumta ki la dawa ban siew bai lutksan ha kaba ki la ujor ruh sha ka High Court bad ka High Court ruh ka la ai da ka hukum ban pynsangeh lane ‘stay order’.
Ïa kane ka bai lutksan na ka liang ki nongshong shnong kim pat shym la ïoh satia haduh mynta, hynrei kyndit-kynsan ha ka Sngi Palei ka tnat Forest ki la wan ban mait bad pom naphang ïa ki dieng kwai kaba la wanrah ruh ka jingkulmar jingmut kaba jur hapdeng ki nongshong shnong kiba dei ki Khasi Pnar namar ka jingleh donbor jong ka sorkar Assam.
Ha kane ka jingwan ka tnat Forest ka Assam, ka la ai syndon ruh da ka shithi lane ka ‘eviction notice’ ïa ki paid Khasi Pnar ba kin mih noh na kitei ki shnong.
