Shillong, Nailur 01
U Myntri ka tnat Ayush ka Sorkar Pdeng, u Sarbananda Sonowal u la kam ba ka Sorkar Pdeng hapoh ka jingïalam u Myntri Rangbahduh ka ri, u Narendra Modi ka la mang haduh T. 3.69 lak klur na ka bynta ki kam pynroi ha ka Thaiñ Shatei Lam Mihngi ha kine 9 snem kiba la leit.
Haba ai jingkren ha ka jingïalang pynkupburom ïa ki samla pule ha U Soso Tham Auditorium ha ka sngi Thohdieng kaba la pynlong da ka Akhil Bharatiya Vidyarthi Parishad (AVBP), u Sonowal u la ong ba u Modi u buh ïa ka Thaiñ Shatei Lam Mihngi kham halor duh na ka bynta ban kyntiew ïa ki kam pynroi ha kane ka thaiñ.
Kumta u la ong ba ha kine ki 9 snem, ki jingpynïasoh surok ha ka thaiñ ki la kiew ar shah na ka 8,480 km sha ka 16,000 km bad ka jingdon ki kad liengsuiñ ruh ka nang kiew.
U la bynrap ruh ba kumba 1,350 tylli ki projek kiba shongdor T.15,760 klur ki la don ha ki bynta bapher bapher jong ka jingpyntreikam ha kane ka thaiñ.
