Shillong, Nailur 01
U Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem haba kynthoh halor ka jingsoi ïa ka soskular ha ka 16 tarik Rymphang, 2007 da ki arngut ki nongmihkhmat, kata u Bah Sanbor Shullai bad u Bah A.L Hek bad ka R&R Colony Welfare Society u la ong ba na ka liang ka Council kan ym kheiñ lada dei u MDC ne u Executive Member (EM) ne uno-uno ruh hynrei ka Council ka la pynmih ïa ka rai ha u snem 2019 ba yn nym lah shuh ban pdiang ïa ki NOC ba la ai sha ki bar jylla hapoh ka R&R Colony Welfare Society.
Haba kren sha ki lad pathai khubor ha ka sngi Thohdieng, u Bah Pynïaid u la kren shai ruh ïa ki briew kiba don hapoh ka R&R Colony Welfare Society da kaba ong ba ka Council kan ym khang halor ka jingdon ïa ki komiti ne ka jingpynlong ïa ki jinglehñiam leh rukom hynrei ha ka synshar khadar pat, ka dei ka Council hi ka ban synshar ym ma ki.
“Ka shnong R&R Colony ka la hap hapoh ka jingsynshar jong ka Dorbar Shnong Rynjah naduh u snem 2019 bad la pynskhem ruh ïa kane da ka Executive Committee bad wat ïa ka kyrteng ruh na ka R&R Colony la pynkylla sha ka Them Rynjah katkum ka jingtyrwa na ka Dorbar Shnong Rynjah”, la ong u Bah Pynïaid.
U la ong ruh ba ka Ri Khasi kam dei kum ka Ri Bangladesh ne kiwei pat ki Ri kiba nabar kin synshar bad ïa ka jingpynbna kaba la pynmih naduh u snem 2019 ka dang ïaineh beit haduh mynta.
Nalor kata, u CEM u la maham ruh ïa ki briew kiba ïaleh pyrshah ban ai ïa ki NOC sha ki bar jylla bad u la ong ba ka Council hi kan shim ïa ki sienjam ban pynshitom da kaba tyngeh kiba katkum ki kyndon aiñ.
U Bah Pynïaid u la ong ruh ba ïa kaba mynshwa ym don jingtip namar ba u khlem don ha ka EC, hynrei ha kane ka EC kaba mynta kum ka Council hi kan ym pdiang da lei lei ruh ba ki briew napoh ka R&R Colony Welfare Society kin lah ban ai NOC ïa ki bar jylla.
Halor ka jingthmu jong ki katto katne ngut ki nongïalam jong ka RR Colony ban thaw shnong lyngba ka jingmynjur jong ki arngut ki nongmihkhmat ka BJP kiba kynthup ïa u Bah Sanbor Shullai bad u Bah AL Hek, na ka liang u Bah Pynïaid u la ong ba ka KHADC ka synshar halor u pud ba la pynkupbor da ka khyrnit kaba 6 jong ka riti synshar bad la ai bor ruh ïa ki MDC ba kin thawaiñ bad ka la don ruh ka ain ïa kaba la tip kum ka United Khasi Jaiñtia Hills Appointment and Succession of Chief and Headman Act, 1959 kaba la batai shai halor ka jingpynskhem ïa ki rukom leh ne pyrshang jong u Khasi kaba long ruh ka jingbud ïa ka synshar khadar tynrai bad lada kine ki briew ki pyrshang ban thaw shnong hapoh R&R Colony Welfare Society, na ka liang jong ka Council kan ujor syndon da ka ejahar pyrshah ïa kita ki briew.
“Ban ong ba katkum kata ka soskular kaba dang ha u snem 2007 kan pynïap noh ïa kane ka riti ka dustur, kata kaba ym lah ban long, tang da ka soskular kaba 2007 ba kin ïasoi da uta u Rangbah Shnong bad da kita ki dkhot badon burom jong ngi ha kata ka por, kan nym lah ban long ban pynïap noh ïa ka riti ka dustur jong ngi kaba la pyrshang da ki spah snem”, la ong u Bah Pynïaid.
U Bah Pynïaid u la ong ruh ba tang lyngba ka rai ba naduh u snem 2007 da ka jingïasoi hapdeng u Rangbah Shnong bad ki nongmihkhmat ha ki snem ba la leit, kan ym lah ban pynïap ïa ka riti dustur kiba la leh naduh ki spah snem mynshwa bad haba ka Council ka kren shaphang u pud u sam ym don sorkar jylla ym don sorkar India ba lah ban batai stad ïa ka riti synshar jong u Khasi.
“Haba ngi kren shaphang u pud synshar, ym don aiñ sorkar jylla, ym don aiñ sorkar India ban batai stad ïa ka riti ka synshar jong ki Khasi jong ngi”, la ong u Bah Pynïaid.
