Shillong, Nailur 01
U Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem u la pyntip ba ka Executive Committee (EC) ka la shim ïa ka rai ban shim ïa ki sienjam kaba tyngeh lada ki Bank ki kyntait ban ai ram wat hadien ba la pynbiang ïa ki kot ki sla kiba donkam halor ka jinglong trai ïa ka jaka.
Ïa kane u Bah Pynïaid u la ïathuh hadien ka jingïalang hapdeng ki Bank ban ïakren halor ka jingshah kyntait ki paidbah kiba shim rai wat la ki la pynbiang ïa ki kot ba la ïoh na ka KHADC ban pynshisha ïa ka jinglong trai ïa ka khyndew ka shyiap ne ka jaka puta.
Haba kren sha ki lad pathai khubor ha ka sngi Thohdieng, u Bah Pynïaid u la ïathuh ba ka EC ka la bthah ïa u Deputy Secretary ba dei khmih ïa ka tnat jaka puta ban thoh sha baroh ki Bank ba ki dei ban ithuh ïa ki kot ba ïoh na ka KHADC ban pynshisha ïa ka jinglong trai ïa ka jaka katkum ka aiñ jong ka Khasi Hills Autonomous District Regulation and Administration of Land Act 2021.
U Bah Pynïaid u la ïathuh ba ka aiñ katkum ka Section 8 clause 9, 10 ka kdew ba ka khyndew, ka dulir pynskhem, ka pata bad ki kot ki sla halor ka jinglong trai ba la ai da ka KHADC katkum ka Khasi Hills Autonomous District Regulation and Administration of Land Act 2021, kin dei ban ïoh jingithuh bad kin dei ruh ki sakhi sabut halor ka jinglong trai ïaka khyndew bad ïa kine ki kot dei ruh ban ithuh da ki Bank bad kiwei ki Financial Institution.
“Na ka liang ka KHADC kan ai ïa ki kot ynda la dep ban pynbiang da ki nong aplai ïa ki jingdonkam baroh bad ki Bank bad baroh ki Financial Institution ki dei ban ithuh ïa kita ki kot katkum ka Khasi Hills Autonomous District Regulation and Administration of Land Act 2021”, la ong u Bah Pynïaid.
Haba kylli halor ka jingkyntait ki Bank ïa ki kot ki sla, u Bah Pynïaid u la ong ba ki don ki Bank kiba la kham heh bad ki don la ki jong ki Regional Area kum ka Ri-bhoi, West Khasi Hills, Jaiñtia Hills bad kane ka lah ban don ka jingbym ïoh jingtip ki nongpynïaid jong kine ki Bank haba ïadei bad ka jingdonbor ka KHADC ban ai ïa ki kot ki sla ban pynshisha ïa ka jinglong trai ïa ka jaka.
“Ka jingïalang mynta ka sngi bad ki Bank ka long ka khubor sha baroh ki Bank ba ka KHADC ka don ïa ka bor haba ïa dei bad ka jingpynshisha ïa ka jinglong trai ka khyndew bad lada ki Bank ki dang kyntait ban ai ram, ngim banse katkum ka aiñ Trading by Non-Tribal Act ngin hap ban khang ïa kine ki Bank”, la ong u Bah Pynïaid.
