Shillong, Nailur 03
Ka jingmih khubor ha kine ki sngi ka la pynshisha noh mynta namar ki nongkitkam ka BJP Mawsynram Mandal naduh ki Primary Unit, Area haduh ka Mandal kin iehnoh kam na ka seng BJP ban leit pynïasoh pura noh sha ka seng National People’s Party (NPP).
Katkum ki khubor ba la ïoh lum la ïathuh ba kane ka jingpynïasoh noh ki nongkitkam BJP sha ka NPP kan long ha ka 6 tarik mynta u bnai (Nailur) ha kaba u MDC ba mynta Bah Alvin Sawkmie ryngkat ki nongkitkam NPP Mawsynram Block kin pdiang burom ïa ki nongkitkam ka BJP Mawsynram Mandal hapoh ka jingïalam u Bah Rudy H Shangpliang kum President bad Bah Bhalang Kharbani kum General Secretary ha ryngkat palat hajar ngut ki nongkitkam ka BJP.
Ki khubor ki ïathuh ba ka jingmih noh ki nongkitkam na ka seng BJP Mawsynram Mandal namar ki don shibun ki daw, hynrei kin leit ban pynïasoh sha ka seng NPP kum shimbynta ban pynkhlaiñ ïa ka ilekshon MDC ban kyrshan ïa u Bah Alvin Sawkmie bad ban pynkhlaiñ ïa ka seng NPP na bynta ka ilekshon MP Lok Sabha.
Ki khubor ki ïathuh ba ki nongkitkam BJP Mawsynram naduh Primary haduh Mandal kin pynlong ka jingïalang ban iehnoh kam ha ka por 12 baje ha Dongneng, Mawsynram. Hadien kata, ha ka por 2 baje noh phai sngi kin leit sha seng Khasi Hall Mawsynram ban rung dkhot pura sha ka seng NPP.
Nalor kane, ki khubor ki ïathuh ba hadien ba ki nongkitkam ka BJP Mawsynram ki la rung sha ka seng NPP, yn sa rung khatduh sa u Bah HM Shangpliang uba dei kyrtong ka BJP ba shah rem ha kane ka ilekshon MLA kaba dang shu dep na Mawsynram constituency.
Nalor nangta, ki khubor ki ïathuh ba ki nongkyrshan u Bah HM Shangpliang kin hap ban kyrshan ïa u Bah Alvin Sawkmie ha kane ka ilekshon hadien ka jingïasngewthuh jingmut hapdeng u Bah HM Shangpliang bad Bah Alvin Sawkmie.
Ha kane ka sngi rung ki nongkyrshan u Bah HM Shangpliang sha ka seng NPP yn donlang ki nongïalam ka seng NPP na Shillong.
