Baghmara, Nailur 03
Ka Gasuapara Unit jong ka Garo Students’ Union (GSU), South Garo Hills (SGH) ka la buh jingkylli ïa ki bor pynïaid ka Jylla halor ka jingbym lah ban pyndep ïa ka shlem ai jinghikai Polytechnic kaba la sdang ha u snem 2019.
Hadien ki jingujor halor ka jingieh noh ïa katei ka projek, ka seng ha ryngkat ki nongshong shnong ka thaiñ ki la leit ban jurip ïa katei ka jaka.
“Ngi la kyndit ban ïohi halor ka jinglong-jingman jong ka ïingmala kaba dang tei naba hadien ba la tap slep, la shu ieh noh ïa ka. Kane ka projek ka lah ban pynbiang ïa kiba bun ki lad ki kabu sha ki samla pule napoh ka thaiñ hynrei ban ïohi ïa ka ha kane ka rukom, ka long kaba i lehraiñ,” la ong u Secretary ka GSU, u Sengrik Marak,
Ïa katei ka ïingmala la ai kontrak sha ka kurim jong uwei u MLA hynrei hadien la aiti noh sha u nongshong shnong ka Dalu, WGH.
Ka seng ka la pynsngew ïa kane ka mat sha ka tnad ba dei khmih kumjuh sha Myntri ka tnad pule-puthi ban dawa pyndep ïa katei ka projek naba kan long ka jingmyntoi ïa ka thaiñ.
