Shillong, Nailur 03
Ka Khasi Students’ Union (KSU) Sengkmie ka la lap ba bun ngut na ki kyrtong kiba la shah jied ban leit pule doktor kiba la paw kyrteng ha ka ‘Open Category’ kim don ïa ki kot ki sla kiba biang ban pynshisha ïalade ba ki dei ki nong Meghalaya.
Kum ban shu kdew hangne, ka seng ha ka 23 tarik Nailar, 2023 ka la pynmih ïa ka kyrwoh halor ka jingshah pynrung ki bar jylla ha ka ‘Screening List’ jong ka bhah pule MBBS ha kaba ka seng ka la ïoh jingtip ba bun ngut ki bym dei ki ’riewlum kiba la ïoh rung ha ka thup ‘Open Category’ ki dei ki bym biang ki kot ki sla ban pynshisha ba ki dei ki nong Meghalaya.
Hadien kane, ka Sorkar Jylla lyngba ka tnad ka koit ka khiah, ka la kular ban bishar bniah ban pynshisha la kita ki samla pule ki dei shisha ne em ki nong Meghalaya.
“Kyndit kynsan ha ka 1 tarik Nailur, 2023, la pynmih ïa ka thup jong ki samla ban ïoh leit pule MBBS lyngba ka bhah Sorkar bad la shem ba kitei kijuh ki bym dei Khasi kiba don ha ka ‘Screening List’ ki la shah jied ban leit pule lyngba ka bhah ‘Open Category’. Kane ka la pynshaïong ngaiñ ïa ki paidbah bad bun ngut ki la ujor sha ka seng,” la ong u General Secretary ka KSU, samla Donald V. Thabah ha ka kyrwoh khubor.
Ka seng hadien kane ka la wad jingtip bniah halor ki kot ki sla jong kitei ki bar jylla bad ka la ïoh ruh ki kot ki sla lyngba ki nongujor RTI halor katei ka phang.
“Ka rukom jied samla pule jong ka Sorkar Jylla ka long kaba bakla shibun, kaba ïuh roit ïa ka hok jong ki samla pule kiba dei ki trai jylla ym tang ki Khasi hynrei wat ïa ki bym dei ’riewlum kiba sah ha ka jylla bad kaba shu leh buit tuh bad leh donbor da mano-re-mano,” la ong u samla Thabah.
Haba kdew ba la lap bun bah ki jingduna ha ka thup ‘Open Category’, u la ong, “Ki kot ki sla jong ki 9 ngut ki bar jylla kiba shah jied ki long kiba duna haduh katta-katta bad kiba i-shan khmat ha kaba ïadei bad ka jingshisha. Katkum ki kyndon, ki samla pule ki dei ban don ki Permanent Resident Certificate (PRC) na ka Jylla, hynrei ka KSU ka la shem ba bun ngut kitei ki bar jylla kim shym la don ka PRC kaba pura, hynrei ki thep pynban da ki Provisional Permanent Resident Certificate (PPRC) kiba treikam tang 3 lane 12 bnai. Kaba mut ba lada kut kita ki 3 bnai lane 12 bnai, kitei ki briew kim dei shuh ki nongshong shnong ka Meghalaya bad la shem ba bun ki PPRC ki la kut ka por treikam.”
Ka seng ka la ong ruh ba don katto-katne napdeng kitei ki 9 ngut kiba khlem phah ïa ka Syrnod Sngikha, katba kito kiba la phah pat la shem ba ki dei ki syrnod kiba dang shu ïoh shen na ka Jylla khamtam na ka thaiñ Ri-lum Garo.
“Katkum ka rukom, kino-kino kiba aplai Syrnot Sngikha hadien shi bnai shaneng ba kha ïa ki, ki hap ai bad ka ‘Court Order’. Kane ka kyndon ka treikam ïa baroh kynthup ïa ki Khasi. Hynrei jan baroh kitei ki bar jylla ki thep ïa ki Syrnod Sngikha ki bym don wat tang ka ‘Court Order’ kaba buh ïa ka jingkylli kumno la ai ïa ki Syrnot Sngikha khlem ki ‘Court Order’,” la ong utei u nongïalam.
U samla Thabah u la ïathuh ruh ba ka Syrnod Sngikha jong uwei u samla pule uba kyrteng u Md Mahmadul Islam ka bym don ‘Court Order’ la ïoh ha u snem 2012 ban pyni ba u dei u nong Meghalaya.
“Hynrei kaba kham i kynsha ka long ba ha kata ka syrnod la kha ïa u ha u snem 2003 hynrei ka tarik pynrung pat ka dei ha u snem 2002. Hato lah seh ban shna syrnod lypa 1 snem shuwa ban kha ïa u briew kumba la ïathuh lypa ba ïa une u briew yn sa kha ha u snem ban wan,” la buh jingkylli u General Secretary.
Ka seng ka la lap ruh ïa uwei u samla pule uba thep da ki kot ki sla ba na Bihar bad Rajasthan kynthup ïa ka Syrnod Sngikha hynrei ïa ka PPRC la ïoh na ka shnong Thangskai, East Jaiñtia Hills, ha kawei ka liang kaba pynlyngngoh ïa ka seng ha kano ka nongrim ba la ai PPRC na Thangskai.
Halor ki 2 ngut ki Khasi kiba la shah pynkynriah noh sha ka thup Khasi-Jaiñtia wat la ki dei ban ïoh rung ha ka thup ‘Open Category’, u samla Thabah u la ong ba kane ka jingleh ka Sorkar ka pynduh noh ïa ka hok jong 2 ngut kiwei pat ki Khasi kiba don ha ka ‘Waiting List’ jong ka thup Khasi-Jaiñtia.
Shuh shuh ka seng ka la ïathuh ba ha u snem ba la dep, ka bhah pule MBBS jong ka Meghalaya ka dei 87 tylli, katba ka Myntri ka tnad ka koit ka khiah ka ong ba ka Jylla ka la ïoh bhah shuh sa 10 tylli – kaba la pynkiew na ka 87 sha ka 97.
“Lada bishar pat ïa ka ka MBBS ‘Quota List’ kaba mynta, don tang 92 ngut ki samla ba shah jied. Shaei jah sa 5 tylli ki jaka (seat)?,” buh jingkylli u samla Thabah.
Shuh shuh u la bynrap, “Kine ki kynrum-kynram baroh ba la lap da ka seng la shem ba ki long ki jingleh donbor bad thombor ïa ki trai jylla naduh ki Khasi, ki Garo bad ki bym dei Khasi ne Garo kaba pynduh ïa ka hok jong ki ban leit pule MBBS lyngba ka bhah Sorkar. Ka pyni ruh ïa ka jingthurmur ka Sorkar bad ki ophisar jong ka kaba ktah ban pynjot ïa ka lawei ki trai jylla. Ka Sorkar ka dei ban pynbeit mardor ïa kine ki kynrum-kynram lym kumta ka KSU kan hap ban shim da ki sienjam kiba tyngeh ban dawa ïa ka hok jong ki samla pule Khasi.”
