Shillong, Nailur 03
Ka Khun Hynñiewtrep National Awakening Movement (KHNAM) ka la tangon tyngeh ïa u MLA ka Pynthorumkhrah, Bah A.L Hek haba ïadei bad ka jingai syrnot ka RR Colony Welfare Society bad ka la dawa na ki bor Sorkar ban pyndam noh ïa kito ki nongthep vote na ka thup kyrteng kiba la ïoh ïa ka EPIC lyngba ki syrnot bad ki kot ki sla kiba la ai da katei Society namar ki long kiba beaiñ.
Ha u kyrwoh ba la pyllait da u Working President ka KHNAM, Bah Thomas Passah, la ong ba ka jingkren u A.L Hek haba ïadei bad ka jingai NOC ban khaïi bad ki syrnot (certificate) nongshong shnong da ka RR Colony Welfare Society kaba long beaiñ katkum ka aiñ jong ka Hima Mylliem, ka la pynkyndit shisha khamtam hadien ba ka Dorbar Shnong Rynjah bad ka KHADC, ki la dep kren da kaba shai kdar haba ïadei bad kane ka mat.
Ka la shai ba ki jingkren u MLA ka Pynthorumkhrah ki dei beit na ka bynta ka saiñ hima jong u.
Haba tangon ïa une u MLA, ka KHNAM ka la ong ba une u MLA kumba u la ïathuh hi, haduh mynta u dang shim ïa ka syrnot nongshong shnong (residential certificate) na ka RR Colony Welfare Society.
“Kane ka pynlong ïa ngi ban ngeit ba baroh kiba shong ha katei ka Colony kim shym la shim ïa ka syrnot nongshong shnong na ka Dorbar Shnong Rynjah, hynrei baroh ki syrnot la ai da katei ka Society kaba long beaiñ bad ym dei kaba long tikna katkum ka aiñ,” la ong u Bah Thomas.
Shuh shuh ka KHNAM ka la ong ba baroh shikatta, ki kot ki sla kiba la ai da ka Sorkar, khamtam kum ka dur thep vote (EPIC), ki dei kiba la ai halor ki kot ki sla bad syrnot ki bym tikna. “Namarkata, ngi kyrpad ïa ka Deputy Commissioner (Election) ban khmih biang bad pynshisha biang ïa baroh ki EPIC kiba la dep ai sha kito ki briew katkum ki kot ki sla bad syrnot kiba la ai da ka Society bad dei ban pyndam bad weng noh ïa ki kyrteng jong ki na ka thup kyrteng thep vote (electoral roll) kham kloi,” la ong u Bah Thomas haba pynpaw ïa ka jingdawa jong ka seng.
