Nongstoiñ, Nailur:
Kum shi bynta ban rakhe ïa ka ‘Foundation Day’ jong ka National People’s Party (NPP) bad ruh ïa ka sngikha jong u nongseng u Purno A. Sangma (Bam Kwai ha Dwar U Blei), ka National People’s Youth Front (NPYF) Nongstoiñ Block ha ka Sngi Thohdieng ka la leit jngoh ïa ki 2 tylli ki jaka ri khunswet hapoh Nongstoiñ ba kynthup ïa ka Rev. S. Wollington Children’s Home ha Nongpyndeng bad ka Green Pasture ha Tiehsaw.
Ha katei ka sngi ka seng ka la ïoh ruh ban kner ïa ki jingnoh synñiang sha kitei ki 2 tylli ki jaka ri khunswet.
U General Secretary, Bah A.L. Syiem u la ong ba ka jingleit jngoh ïa ki jaka ri khunswet da ka seng ban noh synñiang sha ki kam dei shuh ka sien kaba nyngkong hynrei ka la ju ïadon bynta ruh ha ki snem ba la leit kum shi bynta ban leh ïa ka kam kaba bha ha kum kane ka sngi kaba dei ka sngi sdang ïa ka seng da kaba kynmaw burom ruh ïa ka sngikha jong u nongseng.
Shuh shuh u Bah Syiem u la ïathuh ba ha katei ka jingleit jngoh, ki nongpynïaid jong ka Home Rev. S. Wollington ki la buh ka jingkyrpad sha ki nongïalam ka seng ban kren lem sha ka Sorkar ban pyndep noh ïa ka surok ka ban leit sha ka jaka shongneh jong katei ka jaka ri khunswet namar ki la don ka jingthmu ban ïoh leit sah noh sha katei ka ïing, kumta halor katei ka bynta na ka liang ka seng kan sa shimkhia ban kren sha ka Sorkar.
Ha katei ka jingleit jngoh ïa ki khunswet ha kitei ki 2 tylli ki jaka ri khunswet la ïadonlang ruh u Bah Alcomfort Kharbani, President NPYF Nongstoiñ Block, u Bah Kyntonbor Mawsor, GS NPYF WKHD, bad kiwei-kiwei ki dkhot bad nongkitkam ba hakhmat jong ka NPP kiba la ai mynsiem ruh ïa ki khunswet ba kim dei ban sngewrit mynsiem namar ki ‘riew rangbah ki samla ki don ban phaikhmat lem na ka bynta jong ki.
