Shillong, Nailur 03
Ki pulit ka East Jaiñtia Hills ha ka Sngi U Blei ki la ïoh ban kurup ïa 10 kilo tam u drok uba shongdor kumba 15 klur tyngka na uwei u briew uba dang wan na Aizawl, Mizoram.
U SP ka East Jaiñtia Hills, u Jagpal Singh Dhanoa, u la ïathuh ba hadien ka jingïoh jingtip ba uwei u nongkhaïi drok un wan na Aizawl sha Khliehriat lyngba ka Silchar da ka kali Sumo kaba don ïa u nombor AS 01 KC 9188, ki pulit ka Anti Narcotics Task Force ki la pynlong ïa ka jingpynap shrip ha Kongong.
Ha katei ka jaka, la pynsangeh ïa katei ka kali bad la ïoh bat ruh ïa utei u briew uba la wan na Aizawl. Hadien ka jingpeit bniah, la lap 10 tylli ki song na ka synduk jong utei u briew. Haba la peit bniah, la shem ba ha kita ki song, la thep da u drok Crystal Meth (Mescaline). Ka jingkhia jong une u drok baroh ka long 10.16 kilo.
Na ka liang u Myntri Rangbah, Conrad K Sangma, u la pynbna ba utei u drok u shongdor haduh 15 klur tyngka.
Ïa utei u briew na Aizawl uba la shah kem la ithuh kyrteng kum u Lalhmunsanga Beingaichho bad la kurup ruh na u ïa artylli ki mobile phone. Kumta ki pulit ki la kem noh ïa une u briew bad ka jingtohkit ka dang ïaid ban lap sa ïa kiwei pat kiba donkti lang bad u.
