Williamnagar, Nailur 03
Uwei u khynnah uba pule ha ka klas X u la shah pynkit noh shah jaka sumar hadien ba la kynnoh ba u la shah shoh bad leh tohmet ha kumba 5 ngut kiwei pat ki khynnah kiba heh klas ïa u ha Jawahar Navodaya Vidyalaya, Williamnagar, East Garo Hills.
Katei ka jingjia ka la pynbitar ïa kiba bun balang ha ka thaiñ, ha kajuh ka por kiba la dawa pynshitom da kaba tyngeh pyrshah ïa kito kiba donkti ha katei ka kam, ha kawei ka liang kaba la pynlong ïa utei u khynnah klas X ban poi sha jaka sumar.
Hadien kane, la pynkit noh ïa utei uba la mynsaw sha Tura Civil Hospital ha kaba la ïoh jingtip ba ka jinglong-jingman jong u ka la sdang manbha.
Katkum ki tyllong khubor, katei ka jingjia ka la jia ha ka 1 tarik u Nailur hadien ba ka kynhun ki khynnah klas XI ki la khot ïa utei u khynnah ha kawei ka kamra ha kaba la ker tawiar ïa u da kumba 15 ngut kiwei pat ki khynnah ba la heh klas ïa u – klas XI.
Ka jingshah shoh jong utei u khynnah ka la neh katto-katne por ha shuwa ba kin pyllait ïa u.
Hynrei da ka jingshlur, utei u khynnah u la leit sha ki bor ba dei khmih ka JNV ban pyntip halor kaei kaba la jia.
La ïalam noh ïa u sha Williamnagar Civil Hospital na bynta ka jingsumar. U la jer kyrteng ruh ïa kumba 5 ngut kiba la shoh ïa u sha ki bor pynïaid ha shuwa ban shah sumar.
Hadien ba la ïoh jingtip, ki kmie ki kpa ki la ujor noh ïa katei ka jingjia sha ki pulit bad la wan ïalam noh ïa u sha Tura ha kaba u dang sah sumar ha TCH.
“U lanot lem bad kiba shoh ïa u ki dei kiba hapoh 18 snem ka rta bad kumta ngin hap ïaid katkum ka rukom ba ïadei bad ki ‘Juvenile’. Ngi dang tohkit ïa kane ka jingjia bad shen ngin sa phah kaiphod. Ki nongshoh kin shah pynngat hapoh ki kyndon kiba ïahap,” la ong u SP ka EGH, u Siddharth Ambedkar.
Hadien kane, ki bor pynïaid ka JNV ki la pynlong ïa ka jingtohkit halor katei ka jingjia ha kaba ki la lap ïa 7 ngut ki khynnah kiba donkti ha ka ban shoh ïa utei u khynnah katba 10 ngut kiwei pat ki shu long ki nongpeitkai ïa kaei kaba jia.
“7 ngut ki khynnah ki la shah beh skul namar kane ka jingjia katba ki 10 ngut kiwei pat ki la shah sospon. Ngin da lum jingïalang bad ki bor pynïaid ka skul haba ïadei bad katei ka jingjia bad shim rai kumno ban khang ïa kiba kum kine ki jait jingjia nangne shakhmat. Kane ka long ka kam kaba hap ban shimkhia,” la ong u DC, Vibhor Agarwala.
Katkum ki jingtip ba la ïoh lum, utei u khynnah u la lait na ka jingma bad la khmih lynti ba un sa mih noh na ka jaka sumar hadien katto-katne sngi.
Kaei kaba lyngngoh ka long ba kane kam dei ka sien banyngkong ba kum kane ka jingjia ka la jia ha katei ka skul. Ki bor pynïaid ka skul kham ha shuwa ki la beh skul ïa kumba 3 ngut ki khynnah halor ka jingdon bynta jong ki ha kiba kum kitei ki jait kam. Katkum ki tyllong khubor, ki dang bun ki jingjia ki bym paw pyrthei namar ka jingtieng ïoh shah kput kylla.
