Shillong, Nailur 03
Ka Hynñiewtrep National Liberation Council (HNLC) ka pynrem jur halor ki sienjam ba dang shen ba la shim da ka Sorkar Jylla khamtam haba ïadei bad ka shithi na ka ïingbishar kaba khot hajir ïa u General Secretary ka seng, Bah Saiñkupar Nongtraw, wat hapdeng ka jingïaid jong ka jingïakren ïasuk.
“Kane kam dei ka sien banyngkong ha kaba ki nongïalam ka HNLC ba kynthup ïa u Chairman bad Finance Secretary, ki la shah khot hajir katba dang ïaid ka jingïakren. Kiba kum kine ki jingleh ym tang ba ki pynduh noh ka jingshaniah ha ka Sorkar, hynrei ka lah ruh ban pynthut ïa ki jingpyrshang ban kynjoh sha ka thong jong ka jingïapynbeit kaba neh,” la ong u General Secretary-cum-Publicity Secretary ka HNLC, Bah Saiñkupar Nongtraw ha ka kyrwoh khubor.
U la ong ruh ba ka HNLC ka ïai neh ha ka lynti jong ka jingïakren ïasuk bad ka la ïashim bynta shit rhem ha ki jingïakren bad ka Sorkar Jylla.
Haba pynpaw ka jingsngewkhia halor ka jingleh shiliang jong ka Sorkar, u la ong ba ka Sorkar Jylla ka la dawa ïa ka jingïadonlang jong u ha ka jingïalang ba la pynbeit ha ka 30 tarik u Nailur, katba ka MHA pat ha kawei ka liang ka peit khmat ïa baroh ki nongïalam ba rangbah jong ka seng ban wan mih markhmat.
“Ngi ban jur hangne, ba baroh ki nongïalam bad ki dkhot kin ym mih pyrthei katba ym pat pynurlong ïa ki jingdawa jong ngi. Ngi kyntu ïa ka Sorkar ban ïakren bad ka kynhun ba la mynjur da ka HNLC – Central Executive Committee hapoh ka jingïalam u Vice-Chairman,” la ong u Bah Nongtraw.
Utei u nongïalam u la ban biang ba kum shi bynta ban pyntikna ïa ka jingjop jong ka jingïakren ïasuk, ka seng ka dawa pynkhuid ïa ki mukotduma pyrshah ïa ki nongïalam ka HNLC ha kajuh ka por ban tyrwa ïa ka jingïamap.
“Khlem kine ki sienjam ba kongsan, u nongïalam ba hakhmat jong ngi un ym ïashim bynta ha ki jingïakren ba dang ïaid. Katba ngi la ai jingmynjur ïa u Vice-Chairman bad ka kynhun jong u ban mihkhmat ïa ngi ha ki jingïakren, ka jingbym shimkhia ba la pyni na ka liang ka Sorkar ka la sdang ban paw shai. Lada kane ka jinglong ka ïai bteng, ngin ym don lad shuh da kumwei, hynrei ban weng shi syndon na kane ka jingïakren ïasuk,” la ong u General Secretary.
U la ong ruh ba wat hapdeng kine kiei-kiei baroh, ka seng ka kren shai ba kam tieng ïa ki aiñ kiba khlaiñ wat ka jingïap bad kan bteng ha ka jingïakhun jong ka khlem da ïapeiñ ïa ki nongrim.
“Lada ka Sorkar jong phi ka pyni ïa ka jinglong kloi ban pynurlong ïa ki jingdawa jong ngi kaba ïasyrïem bad ka nongrim ka Sorkar India halor ka jingphiah ïa ka Jammu bad Kashmir, kata ngin sa pyrkhat ban buh ïa ka jingshaniah ha ka bor pynïaid jong phi,” la ong u Bah Nongtraw.
Shuh shuh u la bynrap, “Lada ka Sorkar jong phi ka pyni ïa kajuh ka jingskhem jingmut ban phiah ïa ka Meghalaya bad ban pynbna ïa ka Hynñiewtrep kum ka Jylla lajong kumba ki la leh bad ka Kashmir, kata ngin long kiba kloi ban noh bad shaniah ha ka jingsynshar jong phi. Ha kaba kum kane ka jinglong-jingman, ngin ym donkam kano-kano ka jingkyrshan pisa ne kaei kaba phi khot ki “Rehabilitation Packages” na bynta ka HNLC.”
