Tura, Nailur 03
Ki pulit ka West Garo Hills ki la kem ïa kawei ka longkmie ba la tip kyrteng kum ka Hema Malini Koch hadien ba la suba ba ka la pynïap ïa la ka jong ka khun hashwa ban tep noh ïa ka met jong ka hadien ïing ha ka shnong Haripur kaba hap ha thanat Garobadha.
Katei ka longkmie kaba la shah kem ha ka Sngi Saitjaiñ ka dei kaba la 36 snem ka rta bad haduh mynta, kam pat ai ïa ka jingïatreilang bad ki pulit lane ban ïathuh eiei halor katei ka jingjia.
Katkum ka khubor na ki pulit, la suba ba ka Hema Malini Koch ka la pynïap ïa la ka jong ka khun ba dang 7 snem ka rta ha ka por ba ki la don tang arngut ha ïing. Hadien ba la pynïap, la suba ba ka la leit tih da ka thliew hadien ïing jong ka bad tep ïa ka khun hangta.
La suba ba katei ka la jia ha ka step jong ka Sngi Thohdieng katba u kurim jong ka u dang don sha wah ban leit khwai dohkha katba u khun shynrang u la don bad ki bahaïing hasem.
Haba u kpa jong katei ka khynnah u la wanphai sha la ïing, u la mutdur ba ka khun ka dang don sha skul. Hynrei haba u la peit shadien ïing, u la lap pynban ïa ka dak jong ka jingdon ka thliew jingtep, bad haba u la khlong ïa ka khyndew, u la shem pynban ba ka la don ka khun jong u hangta bad kaba la shah tep.
Ïa katei ka jingjia la pyntip sha ki pulit bad ki la wan ban sei ïa ka met jong katei ka khynnah ha ka Sngi Saitjaiñ.
Na ka liang u SP ka West Garo Hills, u Abraham T Sangma, u la ïathuh ba haduh mynta, katei ka longkmie ka khlem pat ai ïa ka jingïatreilang bad ki pulit lane ban ïathuh balei ka la shim ïa ka jingim jong ka khun. “Ngi dang tohkit ïa kane ban tip kaei kaba la jia,” la ong u Sangma.
Ki pulit ki suba ruh ba katei ka jingjia ka lah ban don jingïadei bad ka jingai ksuid watla haduh mynta kim pat ïoh sabut halor kane ka bynta.
U SP u la ong ba ka jingpyrshang ban phah peit bniah ïa ka jingmut jingpyrkhat jong katei ka longkmie ha ki doktor ka la pulom na ka daw ba ka khlem treh ban ïatreilang. Ki pulit kin sa pyrshang biang ïa kane ha kine ki sngi ban wan.
“Na ka liang u kpa jong katei ka khynnah u la mutdur ba ka khun jong u ka dang don ha skul. Hynrei ka jingsuba sniew ka la sdang hadien ba u la lap ïa ka jaka tep briew ha lyndet ïing, bad hadien ba u la tih, u la lap pynban ba la tep ïa ka khun jong u hangta. Naduh ba ka la shah kem, ka kmie jong katei ka khynnah ka khlem pat kren shai eiei bad ka la shu jubab tang shi ne ar kyntien,” la ïathuh u SP.
