Shillong, Nailur 03
Ban ïarap ïa ka Khasi Hills Autonomous District Council (KHADC) ha ka rukom treikam, ka Sorkar Jylla kan phah ophisar ban peit lang ïa ki kam ka Council ha ka kyrdan Special Secretary.
Ka tyllong khubor ka ïathuh ba ka Sorkar Jylla kan phah iwei na ki ophisar MCS ban peit lang ïa ka KHADC bad ban ïarap ïa ka Council ha ka rukom treikam khnang ba ka jingtreikam kan kham bha shuh shuh.
La ong ba ka Sorkar kan thung da ki ophisar kiba dei ha ka kyrdan MCS bad kiba la ju donbynta ha ka jingpynïaid ïa ki kam ka District Council Affairs (DCA) ka Sorkar Jylla.
Kane ka jingthung ophisar ka Sorkar Jylla ka wan ruh ha ka por ba ki lai tylli ki District Council ha Jylla ki shah peitkhmat ha ka Sorkar Pdeng haba ïadei bad ki jingduna ha ka rukom pyntreikam ïa ki skhim pynroi kiba wan lyngba ka Finance Commission naduh ki por ba leit.
Ka Sorkar Pdeng ruh ka la phah peitngor bha ïa ka rukom pyntrei ïa ki skhim kiba wan lang lyngba ka Finance Commission sha ki Autonomous District Council (ADC) khamtam haba ym don ki projek kiba pyntrei ha shnong ha thaw katba ka pisa pat la dep mang ban pyntrei.
La ong ba ki jingduna bad jingbym biang ka rukom pyntreikam ïa ki skhim ha ki katto katne ki District Council ka Jylla, ka la ktah lang ïa ka KHADC kaba pyntuid bad ïaleh katba lah ban pyntreikam bha ïa ki skhim ha ki shnong ki thaw kiba hap ha ki konstitwensi jong ki MDC bapher bapher.
Hynrei la ong ba ki don pat ki District Council kiba ka rukom pyntreikam ïa ki skhim kam long satia kaba ïaid beit bad kumba la khmih lynti.
