Shillong, Nailur 04
Ka Voice of the People’s Party (VPP) ka la dawa na ka Sorkar ba ka dei ban ai por tang 6 bnai ïa ka Expert Committee ba kan pyndep ïa ki kam ba ïadei bad ka jingbishar ïa ka bhah thung kam lane ka State Reservation Policy.
Haba kren sha ki lad pathai khubor hadien ka jingïakynduh ïa u Myntri Rangbah ka jylla ha ka sngi Nyngkong, u General Secretary ka VPP Dr. Ricky AJ Syngkon u la ong ba ka seng ka ai ka jingïaroh ïa ka sorkar namar ka jingthaw da ka Expert Committee ban bishar biang ïa ka Reservation Policy hynrei ka sngew ba ka por ba ka sorkar ka buh haduh shisnem ban pyndep ïa ka kam ka long kaba slem palat.
U Dr. Syngkon u la ong ba ka VPP ka kyrmen ba kane ka Expert Committee kan leh ïa ki kam kata ban bishar ïa ka Reservation Policy khlem da noh shiliang ïa kano-kano ka jaidbynriew jong ka Meghalaya.
“Ka VPP ka sngew ba haduh 1 snem ka long kaba la slem palat ïa ka Expert Committee ban bishar bniah ïa ka Reservation Policy bad dei namar kane ka VPP ka dawa na u Myntri Rangbah ban bthah ïa ka committee ban pyndep noh ïa ki kam hapoh 6 bnai,” la ong u Dr. Syngkon.
