Shillong, Nailur 04
Wat la ka jingïakren ïasuk hapdeng ka seng kieng atiar ka jylla Hynñiewtrep National Liberation Council (HNLC) bad ka sorkar jylla kynthup bad ka Sorkar Pdeng ka dang ïai bteng, hynrei ka seng ka la ïohi ïa ka shithi kaba la phah sha u General Secretary bad Publicity Secretary ka seng, u Bah Saiñkupar Nongtraw, ha kaba u la shah khot hajir ha ka ïingkashari bad shah pynngat ha ki kyndon bad kane ka la pynlong ïa ka seng ban byrngem ban pynsangeh noh ka jingïakren ïasuk bad lada ka sorkar ka kwah ba ka jingïakren ïasuk kan bteng, ka dei ban weng ïa baroh ki mukotduma pyrshah ïa ka HNLC bad ïa ki dkhot jong ka.
Haba kren sha ki lad pathai khubor ha ka Lah Sngi U Blei ha kaba ïadei bad kane, u Symbud Myntri Rangbah ka jylla uba dei khmih ruh ïa ka tnad pohïing, u Bah Prestone Tynsong u la ong ba ka jingshah khot hajir jong kitei ki nongïalam ka HNLC kam dei ba la leh da ka sorkar jylla hynrei kane ka dei shibynta jong ka jingtreikam ka ïingkashari bad kam don bynta eiei bad ka sorkar (Executive).
“Ngi la dep ban don ka jingïakren ïasuk tang shisien bad ha ka jingshisha na baroh artylli ki liang kata na ka liang ka Sorkar Pdeng bad ka sorkar jylla, ngi la kyrpad ïa ki ba kin pynkloi bad ban wanrah ïa ki mat kiba ki kwah ban ïakren, ngi dang ïai ap ïa kita,” la ong u Bah Prestone.
U la kyrpad ïa ki nongïalam ba hakhmat duh jong ka HNLC ba kin shimkhia ïa ka jingïakren ïasuk bad ba kim dei ban don kano kano jingkhuslai jingmut ha kaba ïadei bad ka shithi ba la pynmih da ka ïingkashari namar ba kane ka dei shibynta ka jingtreikam jong ka ïingkashari.
U Bah Prestone u la ong ba lada ka HNLC ka kwah shisha ban poi sha ka jingïakren ïasuk, na ka liang ka Sorkar Pdeng bad ka sorkar jylla ki long kiba shimkhia ban poi sha kata ka thong bad kum ka HNLC ka dei ban ïatreilang bad ka sorkar lyngba u ksiang uba ka seng ka la thung bad lyngba u ksiang ba la thung na ka liang ka sorkar.
Ha kaba ïadei bad ka jingdawa jong ka HNLC ban map ïa baroh ki mukotduma pyrshah ïa ka seng bad ïa ki dkhot jong ka, u Symbud Myntri Rangbah u la ong ba ha kaba ïadei bad kane ka jingdawa, ka sorkar kan hap ban ïakren bad ki nongïalam kiba hakhmat duh jong ka seng namar ba ka sorkar jylla bad ka Sorkar Pdeng ki da angnud shikatdei eh ban poi sha ka jingïakren ïasuk bad ka HNLC.
“Ha kato ka jingïakren kaba nyngkong, ngi la ïakren ïa kine kiei kiei bad ngi la ong ruh ba ngin ïakren bad ki bor kiba kham halor ym dei ban ong tang bad u Vice Chairman lane kine kitei. Ngi kwah ruh ban ïakren bad ki bor kiba kham halor,” la ong u Bah Prestone.
Shuh shuh u Bah Prestone u la kyrpad ïa ki nongïalam ba hakhmat duh jong ka HNLC ba kin wan shakhmat kata ïa u General Secretary ka seng, u Bah Saiñkupar Nongtraw bad u Chairman, u Bah Bobby Marweiñ ba ki dei ban don bynta lang ha katei ka jingïakren ïasuk.
“Nga kwah ban kyrpad ïa ki baroh khamtam ïa ki nongïalam kiba hakhmat duh ba kin sngewbha ban wan shakhmat ha ka jingïakren ka ban sa long khamtam ïa u Secretary lane u Chairman ba kin ïadon bynta lang,” la ong u Bah Prestone.
