Shillong, Nailur 04
U Symbud Myntri Rangbah ka jylla bad uba dei khmih ïa ka tnad kam pohïing ka jylla, u Bah Prestone Tynsong u la ong ba ki lad pathai khubor kim dei ban pynïasoh ne pynïadei ïa ka mat khappud bad ka jingbom jong ki pulit ïa ki paidbah ha Thangskai bad ka jingphet krad ki pulit ha Lapangap.
Haba kren sha ki lad pathai khubor hadien ka 4 tarik u Nailar, 2023 hadien ba la wai ka jingïalang rakhe dap 100 snem ka Khasi National Dorbar kaba la long ha Mawkhar, u Bah Prestone u la ong ba ka jingjia shah bom jong ki paidbah ha ki bor pulit kiba la ïakhih pyrshah ïa ka jingtyrwa pynïar treikam ka Meghalaya Cement Limited kaba la jia ha Thangksai, East Jaiñtia Hills District ha ka 24 tarik u Nailar 2023, ka dei namar ba ki paidbah ki la leh kulmar bad thombor ïa ki pulit.
U Bah Prestone u la kyrpad ïa ki paidbah ba haba ki pynlong ïa kino-kino ki jingïakhih ki dei ban ïakhih da ka burom bad ka lynti kaba dei ban ïaid ym ban ïa pynmynsaw ne ïa shoh ïa dat namar ba ka aiñ ka don bad u la ong ba haba jia kiei kiei pat ki kynnoh ba dei ki pulit kiba lehbeiñ ïa ki paidbah hynrei kum ki bor pulit haba don kino-kino ki jingkulmar ki hap ban leh ïa kaba dei ban leh ym ban shu peitkai.
“Ynda la jia pat teng teng ki ong ba u lehbeiñ u pulit, hato u pulit un shu peitkai? Ngi hap ban leh ïa kaba dei ban leh”, la kubur u Bah Prestone.
Ha kaba ïadei pat bad ka jingphet jong ki bor pulit ka West Jaiñtia Hills District na Lapangap kaba don ha khappud hadien ba ki la shah beh ha ki jaitbynriew Karbi ha ka 26 tarik u Nailar 2023, u Bah Prestone u la ong ba katei ka jingjia ka dei ka mat khappud bad u la ong ba ki lad pathai khubor kim dei ban pynïasoh ïa ka mat khappud bad ka jingbom jong ki pulit ïa ki paidbah ha Thangskai bad ka jingphet krad ki pulit ha Lapangap.
Kane ka dei ka mat khappud. Balei phi ïakren ïa ka mat khappud bad ïa ka jinglong jingman ka hukum bad ka aiñ hapoh ka jylla namar kine ki jingjia ki don jingïapher bak-ly-bak”, la ong u Bah Prestone.
