Shillong, Nailur 04
Ka jingïapyni bor kaba la mih hapdeng ki dkhot ka Hynñiewtrep Integrated Territorial Organization (HITO) bad ki pulit ha ka sngi Nyngkong ka la wanrah ïa ka jingkulmar kaba jur ha surok ban mih sha ophis DC, haduh ba ka la don ka jingkawang bom pynsat khmat bad ruh ka jingïapyni bor kaba mar kylliang.
Kane ka jingmih ka jingkulmar ka la long hadien ka jingshah khot hajir jong u nongïalam ka HITO u Bah Donbok Dkhar ha ki pulit ka thanat Sadar ha ka step sngi Nyngkong.
Ka jingshah khot hajir jong une u nongïalam ka HITO ka long halor ka case ba la pynrung da ki pulit pyrshah ïa une u nongïalam hapoh ka kyndon 171 bad 34 IPC bad ka kyndon 105 jong ka MP Act namar ka jingpynphong uniform rong ïong ïa ki dkhot ka HITO. Kine ki uniform ïong ki ïasyrïem thik bad kiba ju phong da ki pulit SOT.
Ha kane ka sngi, ki nongïalam ryngkat ki dkhot ki la ïalum ha jaka ïeng kali ka MUDA kaba don mar pyrshah bad ka SBI Main Branch bad nangne ki nongïalam bad dkhot ka HITO ki la ïaid paidbah ban leit sha thanat.
Dei tat ynda la dep nangne, ha kaba ki dkhot ka HITO ki la thmu ban wan tur sha Secretariat hynrei ynda la poi ha surok mar pyrshah bad ka ophis DC, ki la shah khang noh sbak ha ki pulit kiba la syrtap ïa kane ka bynta bad hangne la sakhi ïa ka jingsdang pyni bor kaba mar kylliang, ha kaba na ka liang ki pulit ki la hap ban kawang syndon da ki bom pynsat khmat ban pynpra ïa ki dkhot ka seng.
Nalor kane, ka la don ruh ka jingsympat lathi da ki pulit ïa ki dkhot ka HITO, haduh ba la poi u pud ba kine ki dkhot kin phet ruma shane shatei bad ha kum kane ka khyllipmat, ki don ruh kiba la phet sha kawei ka dukan sha kaba don ha kane ka jaka.
Hynrei wat la kane ka dukan sha ka la pynhap noh ïa ka jingkhang ne shatter shapoh, na ka liang uwei na ki pulit tap jaiñ ïong, khlem da pyrkhat ïa ki briew ba don shapoh ki dei kiei, u la kawang beit ïa u bom pynsat khmat na trai jong ka jingkhang shapoh ka dukan haduh ba ka la wanrah ym tang ka jingjulor bad jingduhnong hynrei ban buh jingma ruh ïa ki briew ba don shapoh.
Ha kane ka jingïapyni bor kaba mar kylliang, na ka liang jong ki pulit ki la ïoh ruh ban kem noh ïa 10 ngut ki dkhot ka HITO. Ka jingkem ïa kitei dkhot ka dei halor ka jingkawang maw sha ki pulit bad ki magistrate kiba khang lynti ïa ki ban tur sha Secretariat.
Ha kane ka jingjia, u Superintendent of Police (DySP) u la mynsaw na ka jingshah kawang maw.
Haba ïakren bad ki nongthoh khubor, u Superintendent of Police ka East Khasi Hills, Bah Sylvester Nongtnger u la ong ba ha ka jingshisha, u IO u la khot tang ïa u President ka HITO ban wan sha thanat Sadar, hynrei ki dkhot ka HITO ki la ïawan paidbah.
“Hooid, ngi la shah ïa 5-6 ngut ba kin ïa rung hapoh thanat katba kiwei ki hap ap shabar. Hadien ba ngi la shim jingthoh (statement) la shah ïa u bad kiwei ba kin mih noh na thanat,” la ong u Bah Nongtnger.
“Hynrei ynda ki la mih nangtei, ngi ïoh jingtip ba ki kwah ban wan sha Secretariat bad ban bret ïa baroh ki placard ba ki la rahlang bad ki bad dei halor kane, ba ngi la hap ban khang lynti noh ïa ki,” u la ong.
Ha kane ka jingkhang lynti, ki pulit ki la hap ban pyndonkam lathi bad kawang bom pynsat khmat, ka long hadien ba ka la mih ka jingïakawang maw sha ki pulit bad magistrate bad ktah kti ruh ïa ki pulit kynthei nalor kawang maw ïa u DySP uba la mynsaw malu-mala.
