Shillong, Nailur 04
Hadien ka jingïaid lynti ha ki 99 tylli ki snem, ha ka 4 tarik u Nailur 2023, ka Khasi National Durbar ka la jam sha u mawmer ba 100 snem ha kaba la ïoh ruh ban pynlong ïa ka jingïalang lehkmen kaba la pynlong ha Khasi National Dorbar Hall.
Ha katei ka sngi, la ïadonlang ruh da u Bah Prestone Tynsong uba dei u Symbud Myntri Rangbah ka jylla uba la long kum u kongsan bad uba la shim ïa ka bynta ban pynher ïa ka lama bad plie ruh u mawnongrim jong ka Khasi National Dorbar bad u la leit ban peit ruh ïa ka jaka pyni nam ïa ki matti jong ki briew kiba la seng ha ka Khasi National Dorbar.
Ha katei ka sngi na ka liang u President, u Bah Labarious Manik Syiem u la pashat ïa ki kyntien pdiang burom pynbud sa ka jingpynkup burom ïa u kongsan bad ruh ïa u Rangbah J Kersingh Tariang uba long u nongthoh bad nongpynwandur ryntih ïa ka kot jong ka “Khasi National Dorbar, Ki kam bad ka Seng Pyrkhat jong ka” bad ïa katei ka kot la pyllait paidbah da u Bah Prestone.
Haba ai jingkren ha katei ka sngi kum u kongsan, u Bah Prestone Tynsong u la ong ba na ka liang ka sorkar ka kloi ban ïadonlang bad ka Khasi National Dorbar ha kino-kino ki bynta kiba ka donkam. Na ka liang u Symbud Myntri Rangbah u la noh synñiang ruh T. 1 lak tyngka kum shi bynta ban ïadonlang bad ka Khasi National Dorbar.
“Ngam da lah ban da sngewnguh sngewburom ïa ki nongïalam ba radbah jong ka jylla ka jong ngi haduh ba ngin da ïoh ïa ka jylla lajong bad ka jingproh jabieng jong ki nalor ka 6th Schedule, ngi don la ki jong ki aiñ ki kanun hapoh ka jylla jong ngi”, la ong u Symbud Myntri Rangbah.
U Bah Prestone u la ong ruh haba kyrtiang dien sha ka 4, 5 bad ka 6 tarik jong u snem 1923 haba u ïoh ban pule ha ka jingpynbna paidbah kaba kyntu ïa ki ’riew shynrang kiba la ih bad proh ka jabieng na ka bynta ban wan sha ka dorbar kaba la khot da ki nongïalam ka dorbar bad u la ong ba ha kito ki por ban wan sha ki jingïalang dorbar kan shim por haduh 3 sngi tang ban wan bad da hap ruh ban song bad ka ja hynrei ki briew ba ha kine ki sngi lada ym ïoh ïa ka bai tiket ‘liengsuiñ kan shem jingeh ban wan.
Shuh shuh u Bah Prestone u la ong ba ki don kiba ong ba kam don jingshngaiñ shuh hapoh ka jylla Meghalaya hynrei na ka liang ka jong u, u la ong ba ka don ka jingshngaiñ bad ka donkam ban nang pynkhlaiñ shuh shuh ïa ka jingshngaiñ.
U la ong ka jingkordor jong ki ’riew rangbah ha ki por ba mynshwa ka long kaba khraw haduh katta katta ban ïa lum lang kawei. U la ïaroh ruh ïa ki ’riew rangbah kiba la ïalam ïa ka Khasi National Dorbar da kaba ong ba ki don ïa ka jabieng kaba nep bad ka jingïohi jngai jong ki kaba pynlong ïa ka jylla ban ïoh ïa ka jinglaitluid bad ka jingsynshar dalade ïalade bad u la ong ruh ba ka jingïoh ïa ka 6th Schedule hapoh ka jylla ka long ka stieh kaba khraw ïa ka jylla baroh kawei.
Shuh shuh ha kane ka sngi la ïoh ruh ka jingkren na u Syiem ka Hima Mylliem, u Pa’iem Ainam Manik Syiem bad ka jingpynbyrngia da ki sur jingrwai bad ruh ka sawangka na ka kynhun Riti Academy. La pynkut ïa ka jingïalang da ka jingïashim bynta jong baroh kiba la shah khot sngewbha ban rwai ïa ka jingrwai ieid Ri ïa kaba la tip kum “Ri Khasi Ri Khasi”.
