Shillong, Nailur 04
Ka Hynñiewtrep Integrated Territorial Organisation (HITO) ka la ong ba ka Sorkar ka kwah ban pyntroiñ ïa ka seng namarba ka la dep ujor mukotduma halor ka bhah jong ka pule-puthi.
“Ngi tip shai balei phi kwah ban pyntroiñ ïa ngi namarba ngi la dep ujor mukotduma halor ka bhah jong ka pule-puthi. Ïa kata ki la pyrshang ban leh kumno-kumno, hynrei kam lei-lei…kat phi dang tied katta dang rhem ka mynsiem,” u la ong.
Halor ka jingshah khot ki dkhot ka seng ha ki pulit, u Bah Dkhar u la ong ba katei ka dei halor ka sopti ïong bad ka ‘Vest’ kaba ki dkhot ka seng ki ju phong.
“Ha ka por ba buh jingkylli ïa ngi, ngi la kren da kaba shai ba kam dei ka ‘Uniform’, ngi la pynshai ka ‘Uniform’ ka dei naduh ka juti, patlun, bad ka sopti. Phi la ïohi naduh u 2021 haduh mynta kam don kano-kano ka jingpyrshah, ngi phong beit ka sopti…ma ki pat katkum ka kyndon 171, ki kheiñ ba ka dei ka mar jong ki bad jong kiba phong jaiñ ïong hynrei hangto la kdew shai ïa ka kyrteng bad u shap jong ka seng,” la ong u President.
U la pynshai ruh ba da kaba riam kumtei, ki dkhot ki pynithuh ïalade ba ki dei ki dkhot ka HITO bad ym kiwei-kiwei.
Halor ka jingpynngat ïa ki dkhot ka seng hapoh ka kyndon 171 IPC, u la buh jingkylli ba balei ki pulit kim khot lang ïa kiwei-kiwei naba ym tang ha HITO kaba phong ‘Vest’ – ha nongbah lah ban ïohi ïa kiba bun kiba phong naduh kiba ap ‘Hotel’, ki nongap pahara bad kine-kitai…hato kito ki ïoh jingbit, u la buh jingkylli.
“Balei ïa ki RSS ba phong patlun ‘Khaki’…ïa ki ruh la dei ban pynngat kyndon 171 bad ka rah lathi,” u la ong.
U Bah Dkhar haba kylli na ki pulit mano ba ai ejahar pyrshah ïa ka HITO, ki pulit ki la pynsngew ba kane ka dei ka ‘suo-moto’.
“Ngi sngewthuh ba kane ka jingphah ‘suo-moto’ ïa ka HITO ka dei na ka Sorkar namar balei naduh 2021 kam ju don ka jingpyrshah,” u la ong.
Utei u nongïalam u la kynnoh ruh ba uwei u heh pulit ba la tip kyrteng kum u ‘Ivan’ u la ktah kti bad wad daw shimet ïa u Bah Dkhar ha ryngkat ka jingthmu ban pyntroiñ beit ïa u President ka HITO khnang ban troiñ ka seng.
“Ka jingleh u Ivan, ka long ba u la wad daw shimet namar ngi la don daw ïa u naduh ba kawang tyndong lyer pynsat khmat ïa ki nonghikai, bad mynta ka dei ka por jong ki ban kput ïa ngi,” u la ong.
Na ka liang u President u la kynnoh ba ka jingshoh ka la sdang na ki pulit bad kane ka la jia namarba ka seng ka kren ïa ka jingshisha bad kaei kaba ka seng ka kren ïa ka hok, ka Sorkar ka kwah ban pynsngap-jar ïa ka.
“Naduh ba sdang, phi la ïohi por ba ïaid, ngi la ong ïa ki dkhot ba ym dei ban pynkulmar bad haba ïaid, dei ban ïaid beit ïaid ryntih. Hynrei mano ba sdang kawang tyndong lyer pynsat khmat, ym dei ki pulit…?” la buh jingkylli u Bah Dkhar.
Haba kynnoh ba ka don ka jingïasylla jong ka Sorkar ban pynjah klep ïa ki dkhot ka HITO, u la ong, “Kata nga kren da kaba shai lym kumta kumno kin wad daw shimet haduh katto-katto.”
Haba kylli, u la ong, “Na ka liang jong ngi, ngin ym pyndem, jia katba jia, long katba long, lada ngi hap shong along ruh ngin shong, hynrei ngin shong along da ka nongrim. Kim lah ban pynbor ïa ngi…sa tang lada ki shim noh ka jingim jong ngi, hynrei ka jingieid ri jong ngi kan ym kut kumba ka seng ka la ong ha ka jingteh kular naduh ba sdang.”
Shuh shuh u la bynrap ba ka jingthmu jong ka seng ka long ba hadien ka jingshah khot ha ki pulit, kan leit bret ïa ki ‘Placard’ kumba ka la leit bret syntiew teng hakhmat khyrdop Secretariat.
