Shillong, Nailur 04
Ka jingmih jingkulmar hapdeng ki dkhot ka HITO bad ki pulit ha ka sngi Nyngkong ka la poi shaduh u pud ba na ka liang uwei u pulit tap jaiñ ïong u la kawang syndon da u bom pynsat khmat shapoh kawei ka dukan die sha/ja kaba don ha jaka ïeng kali ka MUDA mar syndah bad ka Shillong Club.
Katkum ka jingjia ha kane ka sngi, la sakhi ba hadien ka jingmih jong ka jingkulmar kaba jur na ka jingïapyni bor hapdeng ki pulit bad dkhot ka HITO, ka la don ka jingkawut lathi bad ruh ka jingkawang bom pynsat khmat, kaba la pynlong ïa ki dkhot kane seng ban phet ruma shane shathai.
Dei ha kum kane ka por ba ki don kiba la kynthih sha kane ka jaka ïeng kali bad don ruh kiba la rung shapoh katei ka dukan die sha/ja, ha kaba ki pulit ruh ki la kthong nadien.
La ong ba ha kane ka por, ha katei ka dukan, nalor ki trai dukan la don ruh ki katto katne ngut ki nongleit bam, hynrei ha ka por ba wan rung ki katto katne ki khynnah, ki trai dukan ki la pynhap noh ïa ka jingkhang ban khanglad ïa kiwei pat.
Hynrei ha kane ka por, na ka liang uwei na ki pulit ba la tap jaiñ ïong uba la kthong nadien, u la sei ïa u bom pynsat khmat bad ban kawang napoh ka jingkhang ne shatter shapoh kane ka dukan, kaba la wanrah ïa ka jingbthei bad jingsawa kaba jam bha.
Ym tang ba ka jingsawa ka la long kaba jam, hynrei ka la wanrah ruh ïa ka jingjulor kaba khraw ïa ki trai dukan, ha kaba baroh ki jingbam kaba ki la shet ryngkat bad ki khiew ki la sep ei lut sha madan. Kane ka la wanrah ka jingduhnong kaba khraw bad ruh kaba la buh jingma shikatdei ïa ki mynsiem briew kiba don hapoh katei ka dukan.
Kane ka jingleh ki pulit ka la wanrah ruh ïa ka jingpynrem na baroh ki liang, kiba la buh jingkylli ba balei la donkam ïa ki pulit ban kawang ïa une u bom pynsat khmat shapoh ka dukan, hato ka aiñ ka shah ïa ki pulit ba kin leh katba mon ne wat ban pynmynsaw ïa ki briew ba lui-lui ki bym don bynta eiei bad kino-kino ki kam pynkulmar.
