Shillong, Nailur 04
Ka Voice of the People’s Party (VPP) ka la dawa na u Myntri Rangbah ka jylla u Conrad K Sangma ban pynkynriah noh mardor ïa u Deputy Commissioner (DC) bad Superintendent of Police (SP) jong ka East Jaiñtia Hills bad kumjuh ruh ban sospon ne weng kam shipor ïa baroh ki pulit kiba donkti ban shoh ïa ki paidbah bad khamtam ïa ki kynthei ha ka shnong Thangskai.
Ïa ka jingdawa ban pynkynriah kam ïa u DC bad SP bad ban sospon ïa baroh ki pulit ophisar bad ki langrut kiba donkti ban shoh ïa ki paidbah, ka VPP ka la leit ban aiti da ka jingthoh sha u Conrad ha ka sngi Nyngkong bad kane ka jingdawa ka long halor jingkynnoh ba ki bor district ki la pyndonkam bakla ïa ka bor ha ka por pynlong ïa ka Public Hearing ha Thangskai.
Haba kren sha ki lad pathai khubor hadien ka jingïalang u General Secretary ka VPP, Dr. Ricky AJ Syngkon u la ong, ka jingleh ki pulit ïa ki paidbah khamtam ïa ki longkmie ba pyrshah ïa ka Public Hearing ka long kaba isaitmet bad ka bym lah ban pdiang.
“Ngi la dawa ba dei ban pynkynriah kam shwa ïa u DC bad SP ka East Jaiñtia Hills bad ban pynlong ka jingtohkit bniah halor ka jingpyndonkam bakla ki pulit ïa ka bor bad ha kajuh ka por dei ruh ban weng kam shipor ïa ki pulit ba donkti ban shoh pynmynsaw ïa ki paidbah khamtam ïa ki longkmie,” la ong u Dr. Syngkon.
U Dr. Syngkon u la ong ruh ba ka VPP ka dawa na u Myntri Rangbah ban phah kem ïa ki nongtrei ka TopCem kiba donkti ban pynshit ïa ki pulit ban bom bad tied ïa ki paidbah kiba pyrshah ïa ka Public Hearing.
Nalor kane ka VPP ka la dawa ruh ban pynlong ka jingtohkit pyrshah ïa ka Meghalaya State Pollution Control Board (MSPB) halor ka nongrim ba ka la pynkheiñ ïa ka hok bad ki kyndon jong ka Public Hearing da kaba kyntait ïa ki katto katne ki kynhun ban wan shim bynta ha kane ka Hearing.
Haba kylli u Dr. Syngkon u la ïathuh ba na ka liang u Myntri Rangbah u la kular ban bishar ïa kine ki jingdawa ka seng ha shuwa ban shim ïa ka rai.
