Jowai, Nailur 04
Ka ïingkashari jong u Session Judge, West Jaiñtia Hills District ka la rai pynrem da kaba set patok shi junom ïa lai ngut ki runar kiba donkti ha ka kam pynïap briew kaba la jia ha ka 1 tarik, Jylliew, 2006 ha ka shnong Thadsning, West Jaiñtia Hills District.
U Superintendent of Police, ka West Jaiñtia Hills District, Jowai u la ïathuh ba ha ka 02.06.2006 la ujor FIR hakhmat u Officer In-charge ka thanat Jowai da uwei u briew uba kyrteng u Barley Chullet uba dei u hynmen jong u lanot ba la shah pynïap u Lobi Chullet, kata da kaba kynnoh ba lai ngut ki briew kiba la tip kyrteng kum u Shem Langstang, u Tharki Langstang bad u Hiarki Langstang ki la pynïap ïa u Lobi Chullet ha ka 01.06.2006 ha ka jaka ba la tip kum ka ‘Ait Shrieh’ kaba don ha ka shnong Thadsning.
Hadien la pynrung case hapoh thanat Jowai katkum ka Jowai PS Case No. 65(6)06 U/s 302/201/ 34 IPC. Ïa kane ka case la shimti da u SI C Lamare na ka bynta ban pynlong ïa ka jingtohkit, bad hadien ka jingtohkit na ka liang u IO uba khmih ïa kane ka case u la pynngat pyrshah ïa kitei lai ngut ki briew hapoh ki kyndon U/s 302/201/34 IPC.
Kumta ha ka 30.08.2023, ka kashari u Sessions Judge, West Jaiñtia Hills, District Jowai ka la rai pynrem ïa kitei lai ngut kiba donkti ha katei ka kam pynïap briew hapoh ki kyndon U/s 302 IPC da kaba set patok shi junom.
