Shillong, Nailur 04
Ka Khasi Hills Autonomous District Council (KHADC) kan dang pynbiang ïa ka jingmang pisa na ka bynta ban pynlong ïa ka Tamasa Mawbynna lane ‘Monolith Festival’ ha Khasi Heritage Village ha Mawphlang na ka bynta ban pyninam ïa ki riti ki dustur u Khasi ka ban sa long naduh ka 4 tarik haduh 9 tarik Nohprah mynta u snem.
Ïa kane la ïathuh da u Chief Executive Member (CEM) ka KHADC u Bah Pynïaid Sing Syiem haba kren sha ki lad pathai khubor ha ka Lah Sngi U Blei, hadien ka jingleit khmih ïa ka Khasi Heritage Village ha ryngkat ki ophisar ka tnat jngohkai ka Sorkar Jylla na ka bynta ban tip ïa ki jingdonkam ha kane ka jingpynkhreh ban pynlong ïa kane ka tamasa.
Ha kane ka sngi, la donlang ruh u Lamphang ka Ïingdorbar KHADC, u Bah Lamphrang Blah uba dei ruh u MDC ka Mawphlang-Diengïei konstitwensi.
Ha kane ka jingleit peit, la lap ba ki don katto-katne ki jingdonkam ban maramot ïa ki jingtei jingshna kiba la don lypa ha Khasi Heritage Village kum ki ïing jong ki Hima Khasi kiba don 11 tylli kiba hap maramot, ki lynti ïaid ba siang da ki maw, bad lynti dewbilat ruh kumjuh, ki jaka leit bar kiba donkam ruh ban shna thymmai, nalor kiwei kiwei ki jingpynitynnad kiba donkam ban leh ha katei ka jaka.
Haba kylli, katno ka KHADC bad ka tnat jngohkai kan pynlut tang ban maramot ïa ki jingtei jingshna, u Bah Pynïaid u la ong ba ïa kane ym pat lah ban ai jingkheiñ noh mynta mynta namar yn dang hap pynbiang ïa ki jingkheiñ jingdiah kiba donkam ban leh.
U CEM u la ïathuh ba na ka bynta ka jingpynlong ïa ka tamasa, ka Sorkar Jylla kan sa ïarap ban bei pisa lang lyngba ka tnat jngohkai jong ka Sorkar Jylla.
U la ong ba ka KHADC ruh ka don la kajong ka bynta ban leh haba ïadei bad ki jinglut ban maramot ïa ki jingtei, bad na ka bynta ban pynlong ïa ka tamasa ha kaba kan sa don ka jingïakynduh lang ban pynbeit ïa kita baroh ha kine ki khyndiat sngi ban sa wan.
Wat la ka KHADC bad ka tnat jngohkai ka Sorkar Jylla kim pat lah ban ai ïa ka jingmang pisa na ka bynta ki jingpynkhreh bad ban pynlong ïa ka tamasa, tangba, na ka jingbatai kiba dei peit ïa ki jingpynkhreh pynkhrum, la sngewthuh shai ba ka jingmang pisa kan long da ki klur tyngka.
