Shillong, Nailur 04
Ka Myntri ka tnad ka koit ka khiah ka Sorkar Jylla, ka Dr. M. Ampareen Lyngdoh ha ka Lah Sngi U Blei ka la kren shai ba yn pynshitom bad weng ruh ïa ki kyrtong kiba la shah jied na ka thup kyrteng MBBS lada lap ba don kano-kano ka jingbakla ha ki kot ki sla ha ryngkat ki jingpynshisha kiba tikna.
“Ngi la ïakynduh ïa ki nongïalam jong ka Voice of the People Party (VPP) bad ngi la ïoh ïa ka jingai jingmut kaba tei na ka seng halor ki katto-katne ki jingbakla kiba don ha ka jingpynbna ba la pynmih ïa ka risol MBBS,” la ong ka Myntri haba kren sha ki lad pathai khubor.
Ka la ong ruh ba hadien ka jingpynshisha ïa ki jingai jingmut ka VPP, la shem ba ki long kiba dei bad kumta la pynkylla noh ïa ka jingpynbna bad ka tnad shen kan sa phah ïa ka jingpynbeit halor ki katto-katne ki jingbakla kiba don ha katei ka thup kyrteng.
Ha kawei ka liang, ka la ong ba ha ka jingïakren bad ka KSU, ka seng ka la kdew ïa katto-katne ki jingduna halor ka jingpynshisha ïa ka jinglong nongshong shnong ba pura (ka Jylla) jong ki kyrtong.
“Kane ka long ka mat kaba hap phikir bha bad ngam lah ban shu shim ïa ka rai lait na ka rai kaba la ai da ki DC jong ki distrik bapher-bapher. Hynrei ka KSU ka don ïa ki jingpynshisha kiba ka sngew donkam ban pynbeit biang,” la ong ka Dr. Lyngdoh.
Ka la pynsngew sha ka seng ba kan ai da ka shithi jingujor khnang ban pynshisha biang sa shisien halor kita ki kyndon ba ïakren bad ka jingpynshisha ba wan na ki DC.
Ha kajuh ka por, ka Myntri ka la ïathuh ba man la iwei-pa-iwei i nongthep aplikeshon na bynta ban leit pule doktor, la phah soi ïa ka jingïateh kaba don ruh ka jingteh bad ka aiñ.
“Lada lap, watla la ai bhah ïa kine ki jaka sha kito ki samla pule…lada lap ba ka dang don ka jingbakla, ngi lah ban weng ïa kito ki kyrtong kiba ngi kyrshan na kito ki jaka ba ki ïoh,” ka la ong.
Ka la pyntikna ruh ban pyrshang pyndep kloi ïa katei ka kam khnang ba kan ym ktah ïa ka jingmang jong ki jaka na bynta ka Jylla.
“Kumne-shi-kumne man ba don kine ki lad ki kabu, ki nongshong shnong la shem ba ki don ki jingbuh jingkylli, ngim dei ban ïohi ïa kum kane ka jingpynwit namar ka jingleit pule doktor ka long kaba kongsan ha kaba bun ki ap ïa kine ki jaka bad lada wan noh da kiwei pat ki bym dei ki nongshong shnong ba pura, ki nongshong shnong ba pura kin sa duh ïa ka lad ban thep aplikeshon,” la ong ka Dr. Lyngdoh.
Haba pynsngew ba ka la ai ka jingkular sha ka KSU, ka Myntri ka la ong, “Lada lap, kam don kano-kano ka jingpyrkhing ba ym lah ban pyndam ïa kano-kano ka bhah jaka bad ngi lah ban weng ïa ki ha kano-kano ka por lada don ki jingpynshisha kiba bniah bad tikna kiba kdew ba ïa kine ki kyrtong…ka syrnod kam long kaba bit.”
Haba kylli, ka la ïathuh ba naduh ba ïoh jingtip halor katei ka bynta, ka la shimkhia halor kitei ki jingkynnoh da kaba thoh sha baroh ki DC bad la bthah ruh ba ki dei ban shimkhia ban pynshisha mardor ïa ki syrnod ba ki nongshong shnong ki la aiti.
“Hadien kane, ka wan biang ka jingmynjur na ka liang ki DC ba kine ki syrnod ki long kiba shisha,” ka la ong.
Shuh shuh haba ban biang ba ka KSU ka donkam ban phah da ka shithi jingujor khnang ban ïoh ïa kata ka jingpynshisha ban khmih bniah biang sa shisien, ka la bynrap, “Lada lap ba kam long kaba shisha, phin shah pynshitom bad yn weng ruh ïa phi na ka thup ba la bhah…ngi la dep phah soi ïa kata.”
