Shillong, Nailur 05
U nongïalam ka United Democratic Party (UDP) u Bah Paul Lyngdoh u la buh jingkylli halor ka jingkwah ban pynlong ‘kawei ka ri, bad tang kawei ka ilekshon’ ha baroh ki Jylla ha India, bad u kdew ba ka India ka dei ka ri kaba long kawei hapdeng ki jingïapher da kaba ai nuksa ruh ïa ka jingïapher jong ka por hapdeng ki thaiñ bapher ha kaba ka por kam long kumjuh na kawei ka thaiñ sha kawei pat ka thaiñ.
Haba pynpaw ïa ka jingsngew halor ka jingthmu ka BJP ban pynlong tang kawei ka ilekshon kata ka ka ilekshon sha Ïingdorbar Thawaiñ jong ka ri (Parliament) bad ka ilekshon sha Ïingdorbar Thawaiñ jong ki Jylla ha India, u Bah Paul u la ong ba ka Sorkar kam pat leh ïa ka jingsngap thuh kaba sani haduh katno kan ktah kum kata ka jingthmu da kaba kdew ruh ïa ka jingïalong kawei ka ri India kaba don bun ki jaitbynriew kiba ïapher iwei na iwei pat.
U la ong ba ka jingïar bad ka jinglong jong ki jaka ha India ha ka la wanrah ruh ïa ka jingïapher jong ka por hapdeng ki thaiñ bapher bapher kiba don hapoh kawei ka ri.
“Ka jingïar bad ka jingbun jaitbynriew hapoh ka ri, la dei ban shim kum ka phang ban ïatai bha la ka lah ne em ban long ban wanrah ban pynlong tang kawei ka ilekshon ha ka ri baroh kawei,” u la ong.
U la ong ba ha kiwei ki bynta jong ka India, ka por ban sdang trei ki nongshong shnong ka kham slem namar ka jinglong jong ka por, katba ha Meghalaya ki briew ki sdang ban trei kloi namar ka sngi ruh ka mih kham kloi shane.
U la kdew ïa ka nuksa jong ka United States of America (USA) kaba don tang kawei ka ri hynrei ka por kam dei tang kawei, hynrei ka don mar la kajong ha ki saw tylli ki thaiñ.
Ka long kaba shisha, ba ka por ka la ïapher hapdeng ka Shillong bad New Delhi. Kum ka nuksa, ha ka por janmiet, ka sngi ka ju sep kloi ha Meghalaya katba ha nongbah Delhi, ka sngi ka sep kham slem.
Kane ka jingkren u Bah Paul ka la wanrah ruh ïa ka jingïapher ka sur hapdeng ki nongïalam ha kane ka Jylla ha kaba la don kiba sngewdei ban pynlong tang kawei ka ilekshon hapoh ka ri, katba ki don pat kiba ym sngew ïahap ban leh kumta.
