Shillong, Nailur 05
Katba ka Ri baroh kawei ka la don hapdeng ka jingïania bad jingïathir hadien ba ka shithi khot bamja miet da ka President Droupadi Murmu ha ka por ban pynlong ïa ka jingïalang bah G20 ha New Delhi ka la saphriang ha kaba la thoh shai ïa ki kyntien ‘President ka Bharat’ (President of Bharat) ha ka jaka ‘President ka Ri India’ (President of India), dang shen u heh duh ka Rashtriya Swayamsevak Sangh (RSS) u Mohan Bhagwat, u la ong ba ki nongshong shnong ka Ri ki dei ban pyndonkam da ka kyntien ‘Bharat’ ha ka jaka jong ka India.
U Bhagwat, uba la kren ha ka jingïalang ba la pynlong da ka Sakal Jain Samaj ha Guwahati ha ka 3 tarik Nailur, u la ong, “Ïa ka Ri jong ngi, la ju tip naduh kulong kumah kum ka ‘Bharat’. Ka lah ban dei kano-kano ka ktien, hynrei ka kyrteng ka sah kumjuh. Ngim dei ban pyrkhat la kiba don shabar kin sngewthuh ne em ïa kane. Lada ki kwah, kin sngewthuh, hynrei kata kam dei ka kamram jong ngi.”
Ha kajuh ka por, u la kyntu ïa ki paidbah ban sdang pyndonkam noh da ka kyntien ‘Bharat’ ha baroh ki liang. “Ka pyrthei ka donkam ïa ngi mynta, ngim donkam ïa ka pyrthei,” la ong u Bhagwat.
Kane kam dei ka sien banyngkong ba ka RSS ka la kyntu ban pynkylla ïa ka kyrteng jong ka Ri sha ka ‘Bharat’. Ki heh ka RSS naduh mynshwa ruh ki la kyntu ban pynkylla ïa ka India sha ka ‘Bharat’ bad ki la ong ba ki nongshong shnong ki dei ban leit phai sha ka tynrai. Ka RSS ka la ju ong ba ka ngeit ba ïa ka kyntien ‘India’ la ai da ka sorkar ki dohlieh, bad namarkata, dei ban pyndam noh ïa ka.
Ha ki jingïalang, ki kot ki sla, ki jingthoh bad ha ki jingïakren ba man la ka sngi, ki dkhot ka RSS ki ju pyndonkam beit tang ïa ka kyntien ‘Bharat’.
