Shillong, Nailur 05
Ka Voice of the People Party (VPP) ka pynrem jur ïa ka rukom treikam jong ka tnat kam pohïing kaba hap hapoh ka jingkhmih jong u Symbud Myntri Rangbah ka jylla bad ba ka rukom treikam ka pyni shai ba ka tnat ka kwah ban pynhiar kput ïa kito kiba ju wohnia ïa ka sorkar.
Ha ka kyrwoh khubor ba la pyllait da u Nongaiktien ka VPP u Dr Batskhem Myrboh u la ong, ka jingpynjari ïa ka khyrnit 171 bad 34 jong ka IPC bad kumjuh ruh ka khyrnit 105 jong ka Meghalaya Police Act 2010 pyrshah ïa ka Hynñiewtrep Integrated Territorial Organisation (HITO) ka pynpaw ïa ka jingpyndonkam bakla jong ki pulit ïa ka bor.
Ki pulit ki la batai sla ïa ka aiñ tang ban ïoh pharep ïa ka HITO. Lah ban pynkynmaw ba ka HITO ka la ïalap ilekshon pyrshah ïa ka NPP ha ka ilekshon MLA ba la dep bad khamtam eh ïa u Symbud Myntri Rangbah, la ong ka kyrwoh.
Ka seng ka pynrem jur ruh ïa ka jingthombor jong ki pulit ïa ki paidbah ba lui lui myn ha ka 4 tarik Nailur, 2023 ha ka por ka jingïaid pyrshah sorkar ka HITO. Ka jingkawang ïa ki tiar pynsat khmat bad kiwei ka la pynjulor bad pynher mynsiem ïa ki riew paidbah. Ka rukom leh jong ki pulit ha Thangskai bad Shillong ka pynshynna ba ka tnat pulit ha Meghalaya ka long kaba tlot palat ka bym lah ban tehlakam wat tang ïa i jingïakhih i barit eh.
Dei ban ai jingpynsaja ïa kito ki pulit kiba donkti ha ka rai ban thombor ïa ki paidbah bad kiba kren da ki ktien khlem akor ba sngew saitmet ha khmat ki paidbah. Kito kiba la mynsaw bad shah pynjulor ki mar ki mata ki dei ban ïoh ïa u bailut ksan kaba dei biang na ka sorkar, la ong ka kyrwoh na u Dr. Batskhem.
U Symbud Myntri Rangbah u dei ban shim ka jingkitkhlieh bad pynthikna ba ka tnat ka dei ban treikam katkum ki aiñ ha kata ka rukom ba kan ïahap dur bad ka riti synshar paidbah, la pynkut ka kyrwoh khubor.
