Nongpoh, Nailar 05
Uwei u rangbah ba la tip kyrteng kum u Bartan Marak, 37 snem ka rta, na ka shnong Garogaon, Rowta, Sub-division Udalguri, Assam, u la khlad noh ha Civil Hospital hynnin ka janmiet ha ka por kumba 4 baje janmiet eiei na ka jingshitom jur hadien ka jingshah shoh ha ki paidbah jong ka MIDC Umïam.
Kum ban shu pynkynmaw biang, la kynnoh ba utei u rangbah uba la riam da ki jaiñ shipai ryngkat ka rah ruh da ka air pistol, u la pyrshang ban leit tuh na kawei ka longïing kaba don ha ka jaka jong ka MIDC ha Umïam. Na ka liang ki nongshong shnong kiba la ïohi, ki la hylla paidbah bad utei u rangbah u la pyrshang ban phet krad ïalade ban kynthih na kawei ka kynroh kat haduh ba un da mynsaw jur ha ki bynta jong ka kjat.
Hadien katei ka jingmynsaw, utei u rangbah u la shah bom shah shoh ruh ha ki paidbah nongshong shnong jong katei ka MIDC kat haduh ba u la mynsaw jur. Na ka liang ki bor pulit kiba la wan poi ha katei por ki la pynkit noh ïa utei u rangbah sha Civil Hospital Shillong na ka bynta ban ïoh ïa ka jingsumar.
Halor kane ka jingjia, na ka liang ki bor pulit ka thanat Umïam, ki dang pynlong ïa ka jingtohkit kaba bniah ban lap ïa ka jingshisha baroh. Kumba ka long mynta, na ka liang ki bor pulit kim shym pat la ïoh kem satia ïa ki briew kiba donkti ban shoh bad bom ïa utei u rangbah.
