Shillong, Nailur 05
U Symbud Myntri Rangbah ka jylla bad uba dei ruh National Vice President ka National People’s Party (NPP), Bah Prestone Tynsong u la ong ba kam pat don kano-kano ka jingïakren kaba tikna ha Parliament lane ha ïingdorbar thawaiñ ka jylla halor ka jingthmu ban pynlong ïa baroh ki ilekshon ha kajuh ka por da ka sorkar pdeng ïa kaba la tip kum ka ‘One Nation, One Election’.
Haba kren sha ki lad pathai khubor, u Symbud Myntri Rangbah u la ong ba katkum ka jingsngew jong u shimet ka jingthmu ban wanrah ïa ka aiñ rew (Bill) “One Nation, One Election” kan ïarap shibun namar kan lait na ka jingpynlut kai ïa ka por, ki jinglut jingsep kin duna bad ka jingpynbunkam ïa ki ophisar.
“Ngam pat lah ban ong eiei halor kata hynrei ha ka jingsngew ka jong nga hi, lada ngi don ilekshon baroh ha kajuh ka por, ngin lah shikatdei ban pynduna ïa ka jingpynlut kai ïa ka por, ngin lah ban kunai ïa ka jingpynlehnohei ïa ka mang tyngka bad ngin lah ruh ban duna ka jingpynbunkam”, la ong u Symbud Myntri Rangbah.
U la ong ba haba don ki ilekshon ka ju don ka jingpynjari da ka Model Code of Conduct lane ka aiñ ilekshon hashwa ki bnai jong ka ilekshon bad kane ka ktah shikatdei eh ïa ka jingïaid beit ïaid ryntih ki kam pynroi kiba la wanrah da ka sorkar pdeng lane ka sorkar jylla.
