Shillong, Nailur 05
Ka Jylla Meghalaya mynta la bun phew snem ka la ju ud ba duna doktor bad kawei na ki daw ka dei namar ba kito kiba ka Sorkar Jylla ka la kyrshan ban leit pule doktor ki khlem wanphai shuh sha ka Jylla ban ai jingshakri hadien ba ki la pyndep ïa ka jingpule MBBS.
Hynrei ki kyndon kiba la pynmih da ka National Medical Commission (NCM) kaba tip kum ka ‘Registration of Medical Practitioners and License to Practice Medicine Regulations, 2023” ka la ai jingshngaiñ ïa ka Jylla Meghalaya kaba dang donkam shibun ki doktor ban wan ai jingshakri ha ki jaka sumar khamtam eh kiba don ha nongkyndong.
Ha kane ka kyndon, ka NMC ka la kren shai haba ïadei bad ka jingai laisen (license) sha kito kiba la pyndep ïa ka jingpule MBBS na ka bynta ban trei kum ki doktor.
La ong ba kito kiba dei ban ïoh laisen ki dei ban thep lyngba ka web portal jong ka Ethics & Medical Registration Board jong ka NMC bad ki dei ban jied ïa ka Jylla kaba ki dei ban leit ai jingshakri bad ïa ka jingthep kyrteng jong ki lyngba ka web portal yn hap phah sha ka Jylla kaba ki wan ne State Medical Council.
La ong ruh ba ka State Medical Council kan sa khmih bniah bad ynda la hun, kan sa pdiang ïa kita kiba thep kyrteng ban ïoh laisen ban trei ha kata ka Jylla ynda la dep ban ïa ka dor kaba dei ban oh.
Ha ka syrnot jong kata ka laisen (license) dei ban don ruh u nombar uba dei ha ka dur jong u Unique Identification Number (UIN) ha ryngkat ka Code jong ka Jylla lane Union Territory.
Shuh shuh ha ka kyndon la kren shai ba ynda la mynjur ïa ka kot thep kyrteng da ka State Medical Council, kata ka dei ruh ban paw ha ka National Medical Register bad ruh ha ka State Medical Register.
Ha kine ki snem ba la leit, bun kiba leit pule doktor lyngba ka State Quota kim wanphai shuh ban trei ha Jylla lajong namar ki la ïoh jaka trei shawei pat ki jaka ki sumar kiba kham paw bad kham biang ka jingsiew.
Kum kine kiba shet kylla ïa ka Jylla, ki ju kloi ruh ban siew noh da ka pisa da kaba pynkheiñ ïa ka soskular lane ka bond kaba la ïateh ha ka por ba ki ïoh ban leit pule lyngba ka bhah jong ka Jylla.
Haba ïakren bad ka Kong Ampareen Lyngdoh kaba dei ka Myntri ka tnat ka koit ka khiah ka Jylla, ka la kubur ba ki kyndon kiba la wanrah da ka NMC ki long kiba kham pyrkhing. Kine kin ïarap ïa ka Jylla ban tehlakam ïa kito kiba la dep pule doktor lyngba ka bhah jong ka Jylla ba kin wanphai ban trei ha ki jaka sumar kiba don ha Jylla.
Ka la ong ruh ba ka don ka bynta kaba wat ïa ka jingïateh soskular hap ban pynkiew khnang ba kito kiba leit pule na ka bhah ka Jylla kin nym lah ban shu siew da kaba suk ïa ka bond sha ka Sorkar Jylla.
Lah ban kdew hangne ba ka Jylla ka duna palat ki doktor kiba ai jingshakri ha ki jaka sumar khamtam lei lei ha thaiñ nongkyndong bad bunsien ka Sorkar Jylla ka ju khot da ki doktor kiba leit pule na pla lajong ym na ka bhah jong ka Jylla.
