New Delhi, Nailur 05 (UNI)
Ka Congress ha ka Sngi Ba-Ar ka la kynthoh ïa ka sorkar BJP halor ka jingphah ïa kawei ka shithi khot sngewbha sha ka jingbam ja miet ha Rashtrapati Bhavan ha ka por jong ka jingïalang bah ki Ri G20 ha kaba ka la kam ba ha ki shithi, ha ka jaka ban thoh ‘President ka Ri India’ (President of India), la thoh pynban da ki kyntien ‘President ka Bharat’ (President of Bharat).
Kiba bun ki la pyrkhat ba kane ka jingthoh President ka Bharat kan ïalam sha ka jingpynkylla noh ïa ka kyrteng jong ka Ri na ka India sha ka Bharat.
U nongïalam ka seng Congress, u Jairam Ramesh, u la pynsaphriang ïa katei ka shithi ha ‘Social Media’ X, bad ha kata ka shithi, la thoh ‘President ka Bharat’ ha ka jaka jong ka ‘President ka Ri India’.
“Ka khubor ka long kaba shisha. Ka Rashtrapati Bhavan ka la phah ïa ki shithi ban khot sha ka jingïabam ja miet jong ka jingïalang bah G20 ha ka 9 tarik Nailur ha kaba la thoh ‘President of Bharat’ ha ka jaka jong ka ‘President of India’ ba la ju pyndonkam baroh shi katta,” la ong u Ramesh.
Na ka liang ki heh sorkar ki la pynpaw ba kane ka dei ka sien banyngkong ba la weng ïa ka kyntien India na ki kam kiba ïadei bad ka sorkar.
Hynrei ki la pynpaw ba ka kyntien ‘Bharat’ ka don ha ka Riti Synshar jong ka Ri ha kaba ka Article 1 ka ong, “Ka India, kata ka Bharat, kan dei ka Union of States” (India, that is Bharat, shall be a Union of States).
Ka jingïalang G20 kan long ha New Delhi ha ka 9 bad 10 tarik Nailur hapoh ka jingïalam jong ka India bad kiba bun na ki nongïalam jong ki Ri ka pyrthei kin wan ban ïashim bynta.
U nongïalam ka seng RJD bad MP, u Manoj K Jha, u la ong ba um ju poi pyrkhat ba ka sorkar bad ka BJP kin sngew sheptieng halor ka kynhun synrop I.N.D.I.A kaba dei ka kynhun ki seng ka liang pyrshah ba la thaw dang katto katne por mynta.
U Myntri Rangbah ka Delhi, u Arvind Kejriwal, u la kynthoh ïa ka sorkar u Modi bad u la ong, “Hato ka BJP kan pynkylla ïa ka kyrteng ‘Bharat’ da kawei pat lada ka kynhun synrop INDIA ka pynkylla ïa ka kyrteng jong ka sha ka Bharat?”
Haba kynthoh ïa ka liang pyrshah, u Myntri Sorkar Pdeng, u Rajeev Chandrasekhar, u la ong, “Ngam sngewthuh kaei ka jingpyrshah halor kane? Ka Ri jong ngi ka dei ka ‘Bharat’…ka Congress ka kwah woh daw bad baroh kiei-kiei. Ngam don jingeh eiei ne jingkhohñioh bad ka kyntien ‘Bharat’.”
“Ka Ri jong ngi ka dei ka ‘Bharat’, bad kam dei ban don ka jingartatien halor kata. Ngin hap ban ap bad peit lada kane ka mat kan long shi bynta jong ka Dorbar Kyrpang ka Parliament.”
U Myntri Rangbah ka Assam, u Himanta Biswa Sarma, u la ong ba u sngewkmen bad sngewsarong ba ka Ri ka ïaid shakhmat da ka jingshlur sha ka Amrit Kaal.
Ha kawei pat ka liang, u Myntri Rangbah ka Tamil Nadu bad President ka DMK, u MK Stalin, u la ong ba ka sorkar BJP ka sngew sheptieng ïa ka kynhun INDIA ba la thaw da ki seng ha ka liang pyrshah, bad namarkata, ka kwah ban pynkylla ïa ka ‘India’ sha ka ‘Bharat’.
Haba kynthoh ha X, u la ong ba ka BJP ka la kular ban pynkylla ïa ka India. “Hynrei kaei kaba ngi ïoh pat ka dei tang ka jingpynkylla ïa ka kyrteng hadien khyndai snem (naduh ba ka BJP ka la don ha ka bor).”
U Stalin u la ong ruh ba ha ka ilekshon Lok Sabha ha u snem ban wan, “Ka India kan beh noh ïa ka BJP na ka bor synshar.”
