Khliehriat, Nailur 05
Ki pulit ka East Jaiñtia Hills District ha ka Sngi Ba-ar ki la ïoh ban kurup ïa u drok heroin uba khia 252 gram na Umtyra ha ka surok National Highway 6 bad kem ruh ïa u briew uba donkti ba la tip kyrteng kum u Thangsiammawia Paite.
Na ka liang u Superintendent of Police ka East Jaiñtia Hills District, u la ong ba kane ka jingjia ka la long hadien ba ki bor pulit hapoh ka jingïalam jong u Deputy Superintendent of Police, Bah J Mairom, MPS ki la ïoh ban bat noh ïa kawei ka kali sumo kamai kaba don ïa u registration number MZ01-P-2566 kaba dang ïaid lyngba ka surok National Highway 6 ha Umtyra.
Hadien ba la pynïeng ïa kane ka kali, ki pulit ki la pynlong ïa ka jingtalasi ha kaba ki la ïoh ban kurup ïa ka synduk kaba don ïa kumba 20 tylli ki jingbuh sabon ba la thep bha ïa une u drok.
Kumta halor kane ka jingjia la pynrung case ruh hapoh ka thanat Khliehriat bad ka jingtohkit ka la ïaid shakhmat khnang ban lapdien ïa kiwei pat kiba donkti ha kine ki kam khaïi drok.
