Shillong, Nailur 05
Ka Jaiñtia Students’ Union (JSU) ha ka Sngi Ba-ar, ka la ai da ka jingthoh sha ka Myntri ka Sorkar Jylla, Kong Ampareen Lyngdoh, ha kaba ka la dawa ban weng noh ïa ka kyrteng jong uwei u bar jylla hadien ba lap ba u la pyndonkam bakla ïa ka syrnot shnong ban ïoh leit pule MBBS na ka bhah jong ka sorkar jylla.
Ha ka kyrwoh khubor ba la pyllait, u General Secretary ka seng u samla Teiborlang Suchen u la ong, ka seng ka la lap ba don uwei na kiba ïoh bhah kyrpang ban leit pule MBBS na ka bhah jong ka jylla bad ka seng ka la lap ba une u briew u la pyndonkam bakla ban ïoh leit pule MBBS na ka bhah jong ka sorkar jylla khlem ka jinglut jingsep na lade.
U samla Teiborlang u la ong, ka seng ka la lap ruh ba une u bar jylla u la pyndonkam ïa ka syrnot shong shnong jong ka shnong Thangskai kaba don ha East Jaiñtia bad ki kmie ki kpa une u khynnah dei kiba trei hapoh ka karkhana pynmih dewbilat bad ka shnong ka la ai syrnot nongshong shnong tang hynriew bnai.
Ka JSU ka la pyntip ba ki nongïalam ka seng ka la ïakren bad u Waheh Shnong Thangskai, Bah Phai Syrti bad u la kubur ba ka dei ka jingpyndonkam bakla ïa ka syrnot shnong da une u bar jylla.
Halor kane ka jingshem, ka JSU ka la dawa ba dei ban pynduh pyndam noh ïa kane ka syrnot bad ka shnong ka hap leh ïa kaba donkam ban lait na ka jingpyndonkam bakla ki bar jylla ïa kane ka syrnot.
Namar kata, ka JSU ka la dawa na ki bor Sorkar ba ki dei ban peit bniah ïa ki kot ki sla kiba aplai ban lait na ka jingpyndonkam bakla ïa ki syrnot. Ki nongïalam ka JSU ki la pynpaw ba na ka liang jong ka Myntri ka koit ka khiah ka Kong Ampareen Lyngdoh ka la kular ban shim khia ïa ka jingdawa jong ka seng.
