Shillong, Nailur:
Ka HYC Umïam Circle, hapoh ka jingïalam ki nongïalam ba kynthup ïa u President bad General Secretary ha ryngkat ki dkhot ha ka janmiet Lah Sngi U Blei ka lah ïoh ban bat ïa 2 tylli ki kali – Force Traveller bad Sumo, kiba shong da kumba 25 ngut ki bar jylla kiba wan na Assam.
Kitei ki briew ki thmu ban leit trei sha ka karkhana ‘Topcem Cement’ ha Ri-lum Jaiñtia bad kiwei-kiwei ki jaka jong ka Sor Shillong.
“Ha ka jingtohkit ka seng, la lap bad shem ba kine ki briew kim don satia ïa ki kot ki sla kiba biang ba kin wan rung bad trei bylla hapoh ka Jylla jong ngi, hynrei sngewlyngngoh ba kumno ki lait ban wan ïaid lyngba ka ‘Infiltration Checkgate’ kaba don ha Byrnihat, Ri Bhoi District,” la ong u President HYC- Umïam Circle, Bah Shinestar Kharpan ha ka kyrwoh khubor.
Kumta na ka liang ka seng, ka la pynphai kylla noh ïa kitei ki kali ha ryngkat ki briew sha ki jaka ba ki wan ha ryngkat ka jingmaham ba kim bit ban wan khlem ki kot ki sla kiba biang.
“Ngi pynrem jur ïa kane ka jingleh jong ki pulit kiba ap ha katei ka khyrdop bad ngi kyntu ïa ki ba ki dei ban shimkhia bad pyndep hok ïa la ka kamram kaba la bynshet ha ki. Kane ka jingleh jong ki ka lah pat ban buh jingma ïa ngi kum ka Jaidbynriew,” u la ong.
Shuh shuh u la bynrap, “Ngin ïai long kiba phikir bad peit pyrman bha bad pynlong ruh ka jingtalasi kaba khah-khah khnang ba ngin ïoh ban khang lad ïa ka jingrung jingmih ki poiei ki poiwir ha kane ka Ri kaba ieid jong ngi nangne shakhmat.”
