Shillong, Nailur 05
Ka President jong ka India, ka Droupadi Murmu ka la sam ïa ka khusnam jong ka ri sha ki nonghikai na kylleng ka ri ha ka jingïalang ba la pynlong ha Vigyan Bhavan, New Delhi mynta ka sngi ha ka jingrakhe ïa ka sngi burom ki nonghikai.
Na Meghalaya, u Bah Timothy Jhones Dhar bad u Madhav Singh ki la ïoh pdiang ïa ka khusnam ‘National Teachers’ Award 2023’ na ka President.
U Bah Timothy Dhar u dei uba hikai ïa ka ‘Mechanic Motor Vehicle’ ha Govt. Industrial Training Institute, Shillong. Ha ki 25 snem ba la leit, u Bah Dhar u la ai jinghikai ha ka ‘Advanced Practical Training’ wat hapdeng ki jingduna kiba don.
U la pyndonkam ïa ka jingsaiñdur thymmai jong u bad ki sap ha ka rukom ai jinghikai jong u bad namar ka mynsiem aiti jong u, ka la plie ki lad ïoh kam ïoh jam ïa kiba shah hikai ha u ha ki kompani bapher-bapher ba ïadei bad ki kam kali bad ki karkhana ba don ha ka Jylla bad shabar ka Jylla.
Ka jingnoh synñiang jong u ka long shisha kaba dei ban ai jingïaroh namar ki jingai jinghikai jong u ka la ïarap ïa ki samla pule ban poi sha ka jingjop. Katto-katne na kiba shah hikai ha u ki la ïoh ïa ki kyrdan ba hakhmat ha ki eksamin All India Trade Test.
U la ïoh pdiang ruh ïa ka khusnam Kaushalacharya ha u snem 2019-20. U long u briew uba ïaishah bad uba shai ka jingmut jingpyrkhat bad um ju ran dien na ki jingeh. Ha u Bah Dhar, kiba shah hikai ki lap ïa u nonghikai ba shisha.
U Madhav Singh ha kawei ka liang u dei u nonghikai saïan ha Alpha English Higher Secondary School, Ri-Bhoi, bad u la pynpaw ka jingkmen jong u halor ka jingïoh pdiang ïa kane ka khusnam.
U Singh u dei u ‘Resource Person’ ha ka National Children’s Science Congress bad u don bynta ban kyntiew ïa ka saïan hapdeng ki khynnah. Kum u nongpynïaid ïa ka Green Club, u la pynlong ïa ki prokram ïada mariang.
U la thoh ruh ïa ka kot ha ka sobjek Health Education. U la ïoh ïa ka khusnam ‘State Best Teacher’ ha u snem 2021. U Singh u la ong ba kane ka jingjop ka long kaba kyrpang bad u la ai jingsngewnguh ïa baroh.
Ha kajuh ka por, u la pynshlur ïa ki khynnah pule ban bteng hok ïa ki jingpule jong ki bad kyntu ruh ïa ki kmie ki kpa ban ai ka jingïatreilang bad ki khun jong ki bad ïarap ïa ki ban sngewthuh ïa ka lawei jong ki.
Ka jingthmu jong ka ‘National Teachers’ Award’ ka long ban rakhe ïa ka jingnoh synñiang ba kyrpang jong ki nonghikai ha ka ri bad ban ka jingmut hadien ka khusnam ‘National Teachers’ Award’ ka dei ban rakhe ïa ka jingnoh synñiang ba kyrpang jong ki nonghikai ha ka ri bad ban pynkup burom ïa kito ki nonghikai, kiba la trei met bad mynsiem, ban kyntiew ïa ka pule puthi bad ïa ka jingim jong ki shah hikai jong ki.
Man ka khusnam ka wan lang bad ka syrnod, ka song tyngka kaba T. 50,000 bad ka takma rupa.
