Shillong, Nailur 05
Ka Seng Samla Mawlai Pyllun (SSMP) ka pynrem jur ïa ka jingleh palat pud jong ka tnat Pulit da kaba kawang da u bom pynsat khmat hapoh ka dukan sha tang ban pynmih ïa kita ki dkhot ka HITO kumjuh ki ’riew paidbah kiba dang shong bamja ha dukan da kaba kynnoh ba ki dkhot ki rung hangta ban rieh ïalade.
Ha ka kyrwoh khubor ba la pyllait da u President ka SSMP u Bah Samuel Biam, ka seng ka pynrem jur eh ïa kane ka jingleh khawpud khamtam eh kaba la poi shaduh u pud ba la pyntieng pynsyier ïa ki kynthei ki longkmie khamtam ïa kiba shong die sha ha kane ka dukan kaba la wanrah ka jinghap lut sha madan ka bam ka dih kaba ki dang dei ban die.
Ka Seng Samla Mawlai Pyllun ka sngewlyngngoh ba lada ki pulit ka jylla ha ki thaiñ khappud ki shah thombor shah beh kthong la ka dei ha ki ’riew paidbah ne ha ki pulit jong kiwei ki jylla ba marjan, kim dei pat ban kput ne thombor ïa la ki jong.
Une u nongïalam ka SSMP u la ong, kane ka jingleh dusmon ka la ktah jur ïa ka kamai kajih jong ki trai dukan kiba shu im da kane ka kam barit kaba ki bsa ïa ka ïing ka sem.
Shuh shuh u la ong, ka jingbom dusmon ïa ki dkhot ka HITO ka long ka bym lah ban pdiang, ka kamram jong ka tnat Pulit ka long ban tehlakam ïa ka shongsuk shongsaiñ wat la ka don ka jingpynthut na kiba kwah ban pynthut. Ka jingtla da ki ktien sih da u heh pulit kaba la saphriang ha rynsan social media ka dei ka jingleh ban pynhiar dor bad thad burom ïa ka tnat bad kaba la pynduh jingshaniah na u paidbah.
Namar kata, ka SSMP ka kyntu ïa ka sorkar ba ka dei ban shimkhia mardor ïa kum kine ki jingleh bym lah ban pdiang. Ka tnat Pulit ka dei ban long ka jingshngaiñ ka nongïada ïa ka Jylla la ka dei hapdeng sor ne haduh khappud ka jylla, kam dei ban long ka tnat kaba thombor ïa u paidbah bad kam dei ban shu ñion palat pud ïa la ki paid ka Jylla tang namar ba ki don ha ka Uniform.
