Shillong, Nailur 06
Ka Directorate of Dairy Development ha ka Sngi Balang ka la aiti ïa ki kali “Milk Transportation & Testing Vehicles (Under NPDD)” sha 18 tylli ki Dairy Co-operative Society (DCS) jong ka Jylla ha Central Dairy Campus, Mawïong, Shillong ha ryngkat ka jingdonlang u Myntri ka tnat Animal Husbandry & Veterinary, Bah A.L. Hek.
Haba ai jingkren ha ka jingïalang, u Myntri u la kubur ba ka jingri ïa ki masi pynmih dud hapoh ka Jylla ka la sdang ban kiew suki-suki bad kumta u la ai mynsiem ïa ki paidbah ban ïadon bynta ha ka kam ri masi pynmih dud kum shi bynta ban kyntiew ïa ki jingbam kiba pynmih na ka dud bad ban long kaba dap ba biang bad ban shaniah ha lade.
Ha kajuh ka por, u la khot la wer ïa ki kynhun shimet ban ïatreilang bad ka Sorkar ban kyntiew ïa ka jingpynmih dud bad ruh ban plie lad ha ka liang ka kam ka jam na bynta ki samla.
Ha katei ka prokram u Myntri u la aiti ïa ki shabi sha ki Dairy Co-operative Society bad kaweh lama ruh kum ka dak ban pyllait ïa ki kali na katei ka jaka.
Kiwei-kiwei kiba la ïadonlang ki kynthup ïa u Secretary ka tnad A.H & Veterinary, Dr Manjunatha C, Director ka Dairy Development, Bah L.S. Shangpliang bad kiwei-kiwei.
