Shillong, Nailur 06
U Bah Ernest Mawrie uba dei u President ka Bharatiya Janata Party (BJP) Meghalaya u la ong ba ka jingkynnoh bad ai daw jong u MLA barim ka Mawsynram, Bah Himalaya Shangpliang ban mih noh na ka BJP, ka dei ka bym shisha bad bym don nongrim.
U Bah Ernest u la kynnoh kylla ba dei u Bah HM Shangpliang uba la shakri peit bahaïing hapoh ka seng, ha kaba u la ïathuh ruh ba na ka liang jong u Bah Himalaya u la kyrpad ïa ka seng ban thungkam ïa u para hapoh ka Mawsynram Mondal.
Kane ka jingkynthoh u Bah Ernest ka la mih pyrshah ïa ka jingkynnoh u Bah Himalaya ba ka don ka jingshakri peit bahaïing bad paralok jong ki nongïalam ka BJP hapoh ka jingïalam jong u, kaba pynlong ïa u Bah Himalaya ban iehnoh kam kum u dkhot ka BJP.
Haba kyntait ruh ba don ki jingïashrut hapoh ka seng, u Bah Ernest u la ong ba ma u, kum u President jong ka BJP Meghalaya, um lah satia ban shim rai halor kano-kano ka kam bad ba u hap ban bud ïa ki jingbthah jong ki nongïalam na Delhi halor ki kam ba ïadei bad ka seng.
Ha kawei pat ka liang, u Bah Ernest u la sei madan ruh ba kumno u Bah HM Shangpliang u la wan khroh ïa u ban mih ïakhun ha ka ilekshon Lok Sabha 2024 bad u la buh kyndon ïa nga ba ngan ‘phone’ ïa baroh ki paralok ba ïatreilang ha kaban kyrpad ban sei da u kyrtong ïamonlang ha kane ka ilekshon.
