Shillong, Nailur 06
Kawei ka ïingbishar ha nongbah ha ka Sngi Balang ka la ai jamin lypa (Anticipatory Bail) ïa san ngut ki dkhot ka Hynñiewtrep Integrated Territorial Organization (HITO) ha kaba ïadei bad ka jingïakynad bad ki pulit ha ka Lah Sngi U Blei hajan ka shlem treikam ka Deputy Commissioner, East Khasi Hills.
Kine kiba la ïoh jamin lypa na ka ïingbishar u Additional Sessions Judge, Shillong, ki long u President ka HITO, u Bah Donbok Dkhar lem bad ki saw ngut – Wanbun N. Dkhar, Shaniah S. Nongrum, James Lyngdoh Nongpyiur bad u Gary S. Myrboh.
Ka jingïoh jamin lypa kitei ki san ngut ka long halor ka jingujor ba la ai ha thanat Sadar (No. 236(9)23) hapoh ki kyndon 147/148/188/53/54/323A/354/323/24/332/07/120B/4 IPC ryngkat ki kyndon 6(1)(2)/7(1)(2) jong ka MMPO Act.
U muktiar jong kitei ki san ngut u la kdew ba ki nongpan jamin lypa ki don ka jingsngew ba ki lah ban shah kem namar ki kyrteng jong ki, ki la paw ha ka kyrwoh ba la phah da u Superintendent of Police ka East Khasi Hills ha ka Lah Sngi U Blei.
Haba u nongbishar u la sngap ïa ka muktiar jong ka sorkar bad jong kitei ki nongpan jamin, u la ai hukum ba haduh ka 11 tarik Nailur, 2023, lada kitei ki san ngut ki shah kem halor katei ka jingujor, ki pulit kin hap ban pyllait ïa ki hadien ba ki la ai ïa ka bai jamin kaba mar T. 30,000 ryngkat bad arngut ki nongbah khlieh.
Hynrei, u nongbishar u la ong ruh ba ka jingai jamin lypa ka long ryngkat bad ka kyndon ba kitei ki san ngut kin hap ban leit mih hakhmat u heh pulit uba tohkit halor katei ka jingjia hashwa ka 11 tarik Nailur, 2023 bad kin hap ban ai ïa ka jingïatreilang bad ki nongtohkit, bad kim dei ruh ban byrngem lane leh eiei ïa ki briew kiba don jingtip ïa ki jingshisha halor katei ka jingjia.
Lada kitei ki san ngut kim ïaid katkum ki kyndon ba la buh da ka ïingbishar, kata kan ïalam sha ka jingpynduh noh ïa kane ka jamin.
Ka ïingbishar kan sa shong bishar biang halor katei ka mukotduma ha ka 11 tarik Nailur, 2023.
Haduh 10 ngut ki dkhot ka HITO ki la shah kem ha ka Lah Sngi U Blei hadien ba ka la mih ka jingïakynad bad ki pulit hakhmat ka shlem treikam ka Deputy Commissioner ha kane ka nongbah. Ka jingïakynad ka la sdang hadien ba ki dkhot ka HITO ki la thmu ban leit tur sha Secretariat katba ki pulit ki la pakhang lynti.
Ka la don ruh ka jingshah sympat lathi, jingsiat ïa ka lyer pynsat khmat bad jingkawang maw ha katei ka sngi.
Ka huri hura ka la sdang hadien ba ki dkhot ka HITO ki la wanphai na thanat Sadar. Ha katei ka sngi, ki nongïalam ka HITO ki la shah khot hajir ha ki pulit ka thanat Sadar halor ka jingpyndonkam jong ki ïa ka riam sopti ïong ha ki jaka paidbah.
