Jowai, Nailur 06
Ka Meghalaya Estimate Committee (MEC) ha ka Sngi Balang ka la hiar sha West Jaiñtia Hills District ban leit jurip ïa ka Residential School kaba don ha ka shnong Sabahmuswang, West Jaiñtia Hills District.
Kane committee hapoh ka jingïalam u Chairman uba dei ruh u MLA ka Nongpoh Bah Mayralborn Syiem ha ryngkat ka jingsynran lang u MLA ka Mawkyrwat Bah Renikton L Tongkhar, MLA ka North Shillong Bah Adelbert Nongrum, MLA ka Jowai Bah Wailadmiki Shylla, MLA ka Selsella u Arbinstone B Marak bad ka MLA ka Ampati ka Miani D Shira ki la leit ban jurip ïa kane ka residential school ban bishar bniah halor ka jinglong jingman bad ka rukom long ka jingtei jong kane ka jaka pule.
Na ka liang ki dkhot ki la ailad ruh ïa u Waheh Shnong ka Sabahmuswang bad ïa ki trai kiba noh synñiang ïa ka jaka na ka bynta ban tei ïa kane ka residential school ba kin pynpaw ïa la ki jingeh bad halor kino-kino ki mat kiba ïadei bad kane ka skul bad halor ka jingtreikam jong ka.
Hadien kane, ïa kine ki dkhot la leh burom ha ka jingïalang kaba la long hapoh ka community hall ha Sabahmuswang.
Shuh shuh ha kane ka jingïalang la don lang ruh Deputy Commissioner, West Jaiñtia Hills u Bah BS Sohliya, IAS, District School Education Officer, Jowai ka Kong AP Syiem bad ki heh na ka tnat PWD (Building).
