Shillong, Nailur 06
U Myntri ka Sorkar Jylla, Bah A.L Hek uba dei ruh u nongïalam ka BJP ha Meghalaya u la ong ba ka jingtyrwa ban pyntreikam noh da ka “One Nation, One Election” da ka Sorkar Kmie ka long shisha ka jingmyntoi kaba khraw na ka bynta ka roi ka par jong ki jylla bad ka ri.
Haba kren sha ki katto katne ki lad pathai khubor, u Bah Hek u la ong, ka Ri India ka la dei lypa kawei ka Ri (one nation) bad kawei ka ilekshon hapoh ka Ri ka dei kaba bha palat namar kumba ka long mynta, hapoh ka Ri ki don bun tylli ki Jylla bad ha ka shisnem, ki don haduh 3 ne 4 tylli ki ilekshon, kaba wanrah ïa ka jingdkoh treikam namar la hap ban ïabunkam.
U la ong, “Ngi don ki ilekshon sha ka ïingdorbar thawaiñ ki jylla, ka ilekshon MP, ilekshon Panchayat, ilekshon MDC. Kumta lada kawei ka Jylla ka don ilekshon, la treikam ka Model Code of Conduct kaba khang ïa ka jingïaid ki kam pynroi. Kawei hadien kawei, katno shuh ki MCC kin khang ïa ka jingïaid ki kam pynroi.”
U Bah Hek u la kdew ruh ba lada phai sha ka jinglut jingsep, ka pisa kaba bun bah la pynlut ha man ka por ba pynlong ïa ki ilekshon, nalor ki bor pahara bad ka por jong ki nongïalam ruh la shu lut tang ha ka ilekshon.
U la ong, “Dei ba don noh tang kawei ka ilekshon, kato ka jinglut jingsep ba pynlut man la ki ilekshon la lah ban pyndonkam noh sha ki kam pynroi jong ki Jylla bad ka Ri India baroh kawei”.
