Shillong, Nailur 06
Tang hadien katto-katne kynta ba u Bah HM Shangpliang u la phah ïa ka shithi iehnoh kam sha u President ka Bharatiya Janata Party (BJP) Meghalaya Unit, Bah Ernest Mawrie halor ka jingbym sngewtynnad ïa ka rukom treikam jong u, hynrei ha kane kajuh ka sngi ki nongkitkam kiba don palat ar hajar ngut jong ka BJP Mawsynram Mandal ki la mih noh na kane ka seng.
Ki nongkitkam kiba la don palat ar hajar ngut kiba kynthup tang na ki Primary Unit, Area bad Mandal naduh ki rangbah, ki samla bad longkmie ki la ïakynduh lang ha ka Sngi Balang ha Mawsynram ban mih lang noh na kane ka seng BJP da kaba phah shithi iehnoh kam sha ka seng BJP.
Hadien ba la dep iehnoh kam, ki nongkitkam kiba hakhmat jong ka BJP Mawsynram Mandal hapoh ka jingïalam u Bah HM Shangpliang ki la pynlong ka jingïakynduh kaba kyrpang bad ki nongkitkam kiba hakhmat jong ka NPP Mawsynram Block hapoh ka jingïalam u Bah Alvin Sawkmie uba dei u MDC ba mynta.
Ha kane ka jingïakynduh la ïa pynbeit ba ki nongïalam ka NPP kin pdiang burom ïa ki nongkitkam bad ki nongkyrshan kiba dang shu iehnoh kam na ka seng BJP ban long ha ka 12 tarik mynta u bnai ka ban long ha Mawsynram. Katba ïa u Bah HM Shangpliang yn sa pdiang burom ha kawei ka sngi da u Myntri Rangbah ka jylla ha Shillong.
Haba ïakren bad u Bah HM Shangpliang u la ïathuh ba mynta ka sngi (Sngi Balang) ki nongkitkam ka BJP ruh ki la mih lang hadien ba u la dep iehnoh na ka seng BJP bad ha kane ka sngi ki nongkitkam hapoh ka jingïalam ka jong u ki la pynlong ka jingïakynduh lang bad ki nongkitkam ka NPP hapoh ka jingïalam u Bah Alvin Sawkmie.
Kum ban shu pynkynmaw, u Bah HM Shangpliang haba u ïakhun na ka seng BJP ha ka ilekshon MLA ba dang shu dep u la ïoh 10,032 vote, u Bah Alvin Sawkmie na ka seng NPP u la ïoh 10,002 vote bad u kyrtong ka UDP, Bah Olan Suiñ uba la ïoh ïa ka jingjop u ïoh 10,987 vote.
Kum ban shu kdew ka jingrem u Bah HM Shangpliang bad Bah Alvin Sawkmie ka dei namar ka ‘vote’ ha shnong Mawsynram bad ha khappud ba sah ki bym dei Khasi ki ïaknieh beit hapdeng kine ar ngut. Hynrei lada kine baroh ar ngut ki la ïatreilang ka don jingkyrmen bha ba ka NPP kan ïoh biang ïa ka shuki MDC na Mawsynram konstitwensi lada ka ilekshon kan long la shem snem.
Ki khubor ki ïathuh ba ki nongkyrshan ka BJP ha Mawsynram ki la pynpaw ka jingsngewkmen haba la ïohi ïa ka khubor ba u Bah HM Shangpliang un mih noh na ka seng BJP namar kim sngewtynnad shuh ban don bad kane ka seng naduh ba ka mih ka jingjia ha Manipur.
